Nga gjithsej 225 persona të paraburgosur në institucionin e Reçit, vetëm 10 prej tyre rezultojnë të akuzuar për vepra që lidhen me krimin e organizuar dhe korrupsionin.
Këto të dhëna dolën në dritë nga kryetarja e Komisionit për të Drejtat e Njeriut dhe Mediat, Jorida Tabaku, e cila ndërmori një vizitë monitoruese në këtë burg.
Të lidhura
None found
Deputetja u shpreh kritike ndaj arsyetimeve të mazhorancës lidhur me modifikimet e Kodit të Procedurës Penale, sidomos për sa i përket masës së sigurisë “arrest në burg”.
Sipas saj, ballafaqimi me krimin e organizuar dhe korrupsionin kërkon një përkushtim politik të vazhdueshëm, faktor që ajo e cilëson si një nga sfidat themelore të Shqipërisë në rrugën drejt integrimit europian.
Gjatë qëndrimit në burgun e Reçit, anëtarët e komisionit, të shoqëruar nga përfaqësues të Komitetit Shqiptar të Helsinkit, të Avokatit të Popullit dhe të OSBE-së, u informuan për kushtet e mbajtjes dhe mënyrën e trajtimit të personave në paraburgim.
Procesi i monitorimit do të shtrihet edhe në njësi të tjera penitenciare, ndërsa do të përmbyllet me hartimin e një raporti, ku do të përfshihen problemet e identifikuara dhe rekomandimet për ndërhyrje në legjislacion.
