Është mbyllur protesta e ditës së 135-të kundër qeverisë së Edi Ramës, e zhvilluar në Tiranë.

Pas përfundimit të fjalimeve, protestuesit marshuan drejt Kryeministrisë dhe qëndruan pranë godinës, pasi aktivisti Edison Lika njoftoi se kryeministri Edi Rama ndodhej në zyrën e tij.

Pas kësaj thirrjeje, protestuesit u zhvendosën drejt njërës prej hyrjeve të Kryeministrisë, ku forca të shumta policie krijuan një kordon për të penguar afrimin e tyre.

Gjatë qëndrimit para godinës, Lika u bëri thirrje protestuesve të vijonin qëndrimin në mënyrë paqësore, duke deklaruar: “Kryeministria është e jona, Bulevardi është i yni”.

Pas qëndrimit para Kryeministrisë, protesta e sotme u mbyll, ndërsa gjatë tubimit u përsëritën thirrjet kundër qeverisë së Edi Ramës.

Në përfundim të protestës, protestuesit u bënë thirrje studentëve dhe qytetarëve t’i bashkohen protestës së nesërme, e cila do të zhvillohet në orën 14:00 përpara Ministrisë së Arsimit.