Një tjetër skandal mund të vërë në vështirësi presidentin e FIFA-s, Gianni Infantino. Sipas një hetimi të publikuar nga e përditshmja britanike “The Times”, kreu i futbollit botëror dyshohet se ka përfituar miliona dollarë përtej pagës zyrtare dhe bonuseve të parashikuara në kontratën e tij, përmes pagesave që nuk janë bërë publike.
Sipas gazetës britanike, këto të ardhura shtesë lidhen me kompaninë e krijuar për organizimin e Botërorit 2026 në Shtetet e Bashkuara, ndërsa një pjesë e parave dyshohet se është përdorur për të mbuluar shpenzimet e një stili luksoz jetese në Miami.
Pagesa shtesë jashtë raportit zyrtar
“The Times” kujton se, që prej vitit 2016, FIFA ka premtuar publikimin çdo vit të pagave të presidentit dhe sekretarit të përgjithshëm. Megjithatë, sipas hetimit, Infantino mund të ketë përfituar të ardhura nga dy burime të ndryshme: një pagë zyrtare, e pasqyruar në raportet financiare të FIFA-s në Zvicër, dhe pagesa të tjera nga kompania organizatore e Botërorit në SHBA.
Sipas raportit vjetor të FIFA-s, në vitin 2024 Infantino përfitoi 4 milionë e 274 mijë franga zvicerane. Por, sipas dokumenteve të të ardhurave të paraqitura pranë Shërbimit të të Ardhurave të Brendshme të SHBA-së (IRS), për të njëjtin vit në emër të tij u paguan edhe 1.76 milionë dollarë nga kompania “FIFA World Cup 2026 US Inc.”, e krijuar për organizimin e turneut. Kjo shumë, sipas “The Times”, nuk ishte bërë publike në raportin vjetor të FIFA-s.
Një pjesë e këtyre parave dyshohet se është përdorur për të mbuluar qiranë e një vile luksoze në Sunset Islands, një zonë ekskluzive e Miami Beach. Kompleksi rezidencial përbëhet nga katër ishuj artificialë dhe është i rrethuar e i mbikëqyrur.
E kontaktuar nga “The Times”, FIFA nuk e konfirmoi informacionin për pagesat dhe nuk dha shpjegime për arsyen pse shuma e përmendur nuk ishte pasqyruar në raportin vjetor të institucionit.
Ndërkohë, burime të cituara nga gazeta britanike pretendojnë se pagesa të ngjashme janë kryer edhe për vitet 2025 dhe 2026. Deri më tani, FIFA nuk ka dhënë një sqarim publik për këto pretendime.