TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një violinist profesionist me origjinë shqiptare është dënuar nga Gjykata Penale e Nicës në Francë, pasi u kap duke transportuar 38,33 kilogramë kokainë të fshehur në automjetin e tij. Bëhet fjalë për 45-vjeçarin Beng Bakalli, i cili u dënua me katër vite burg, njëri prej të cilëve me kusht, si dhe me një gjobë doganore prej 1,1 milion eurosh.
Sipas mediave franceze, Bakalli u arrestua më 10 gusht, në pikën e pagesës së La Turbie, në autostradën A8, pranë kufirit franko-italian. Ai po udhëtonte drejt Italisë me një automjet tip “Citroën C5 Aircross”, kur doganierët konstatuan një parregullsi në pjesën e dyshemesë së makinës.
Kontrolli më i detajuar zbuloi dy ndarje të posaçme të fshehura nën dysheme, ku ishin vendosur 38,33 kilogramë kokainë. Vlera e ngarkesës vlerësohet në më shumë se 1 milion euro, ndërsa disa raportime e çojnë vlerën e mundshme në tregun e paligjshëm në rreth 2 milionë euro.
90 mijë euro, armë zjarri dhe jelek antiplumb në banesë
Pas arrestimit, hetuesit kontrolluan banesën e violinistit në zonën e Besançon-it. Gjatë kontrollit u gjetën rreth 88.900 euro para të gatshme, katër armë zjarri të kategorive B dhe C, dy pushkë, një jelek antiplumb dhe një sasi e madhe municionesh. Sipas një raportimi të RTL-së, u sekuestrua gjithashtu një telefon i koduar.
Për paratë e gjetura, Bakalli deklaroi se ato i ishin dhuruar nga babai i tij, Hasan Bakalli, gjithashtu violinist. Ndërsa për armët, ai shpjegoi se merrej me qitje sportive. Megjithatë, sipas raportimeve franceze, jo të gjitha armët rezultonin të deklaruara.
Çështja ndaj tij përfshinte trafikimin e lëndëve narkotike, mbajtjen e armëve dhe pastrimin e parave. Gjykata e liroi nga akuza e pastrimit të parave dhe urdhëroi kthimin e shumës së parave të sekuestruara në banesë.
Transporti për 20 mijë euro, marrëveshja u sigurua gjatë një udhëtimi në Shqipëri
Gjatë procesit gjyqësor, 45-vjeçari deklaroi se kishte pranuar të transportonte drogën kundrejt një pagese prej 20 mijë eurosh. Sipas versionit të tij, marrëveshja ishte siguruar përmes disa personave që kishte njohur gjatë një udhëtimi në Shqipëri, vendin e tij të origjinës.
Ai pretendoi se automjeti i ishte dhënë nga një garazhist spanjoll dhe se gjatë udhëtimit udhëzohej nga persona, identitetin e të cilëve tha se nuk e njihte. Gjithashtu, ai deklaroi se nuk ishte kërcënuar apo detyruar të merrte përsipër transportin.
Një nga elementet që tërhoqi vëmendjen e hetuesve lidhet me mundësinë që ky të mos ishte transporti i tij i parë. Të dhënat GPS të automjetit treguan se ai kishte përshkuar të paktën një herë më parë të njëjtën rrugë. Bakalli u mbrojt duke pretenduar se udhëtimi i mëparshëm kishte qenë një provë për të parë nëse itinerari ishte i realizueshëm.
Gjatë procesit, ai shprehu pendesë për përfshirjen në këtë ngjarje.
“Nuk arrij ta shpjegoj se si përfundova në këtë situatë”, kishte deklaruar ai gjatë marrjes në pyetje.
Sipas një raportimi të mëparshëm, në një tjetër moment ai ishte shprehur: “Nuk mund ta kuptoj madhësinë e asaj që kam bërë. E kuptoj që do të humbas gjithçka”.
Violinist i orkestrës simfonike në Francë
Beng Bakalli ka lindur në Shqipëri dhe jeton në Francë që prej vitit 1991. Ai është baba i katër fëmijëve dhe ka studiuar në disa konservatorë francezë, përfshirë institucione në Lion, Dijon dhe Besançon.
Përpara arrestimit, ai ishte anëtar me angazhim të përkohshëm i Orkestrës Simfonike Victor-Hugo Bourgogne-Franche-Comté (OVH), e cila ka gjithsej 71 muzikantë, 30 prej të cilëve janë të përhershëm.
Pas arrestimit të tij, drejtuesit e orkestrës theksuan se ngjarja nuk kishte lidhje me aktivitetin profesional të institucionit.
“Arrestimi nuk kishte ndodhur gjatë angazhimeve të tij me OVH-në”, deklaruan ata, duke sqaruar se Bakalli ishte pjesë e grupit të muzikantëve me angazhime të përkohshme.
Edhe bashkia e Besançon-it reagoi për rastin, duke theksuar se përgjegjësia ishte individuale dhe se ngjarja nuk duhej të lidhej me institucionin muzikor.
“Bëhet fjalë për veprimin e një individi të vetëm, i cili nuk duhet të ngatërrohet me Orkestrën Victor Hugo”, ishte qëndrimi i bashkisë.
Gjykata jep vendimin, prokuroria kishte kërkuar 6 vite burg
Gjykimi ndaj Bakallit u zhvillua më 9 tetor në Gjykatën Penale të Nicës. Prokuroria kishte kërkuar gjashtë vite burgim, por gjykata vendosi një dënim prej katër vitesh, njëri prej të cilëve me kusht, si dhe një gjobë doganore prej 1,1 milion eurosh.
Kjo do të thotë se tre vite të dënimit janë me burgim efektiv.
Rasti ka tërhequr vëmendjen e mediave franceze për shkak të sasisë së madhe të kokainës së sekuestruar dhe profilit të të dënuarit, i cili për vite me radhë kishte ushtruar profesionin e violinistit në Francë.
