Real Madridi rekord për golat e anuluar nga VAR-i, sa dyfishi i Barcelonës

Real Madridi është skuadra me më shumë gola të anuluar nga sistemi VAR në La Liga që prej sezonit 2018-2019. Sipas statistikave të publikuara nga gazeta spanjolle “Mundo Deportivo”, madrilenëve u janë anuluar 42 gola, plot 23 më shumë se rivalëve të tyre të përjetshëm, Barcelonës.

Teknologjia VAR vazhdon të jetë në qendër të diskutimeve në futbollin spanjoll, ndërsa statistikat e publikuara nga “Mundo Deportivo” nxjerrin në pah një të dhënë interesante: Real Madridi kryeson listën e skuadrave me më shumë gola të anuluar pas ndërhyrjes së sistemit të videopërsëritjeve.

Që prej prezantimit të VAR-it në La Liga, në sezonin 2018-2019, skuadrës madrilene i janë anuluar 42 gola. Në vendin e dytë renditen Atlético Madrid dhe Villarreal, me nga 22 gola të anuluar secila.

Pas tyre vijnë Celta Vigo, Real Sociedad dhe Sevilla, me nga 20 gola, ndërsa Barcelona ka regjistruar 19 gola të anuluar. Diferenca mes dy gjigantëve të futbollit spanjoll është 23 gola.

Shembulli më i fundit i ndërhyrjes së VAR-it në dëm të Real Madridit ishte rasti i Vinicius Junior në ndeshjen kundër Villarrealit, e cila përfundoi me fitoren 1-0 të madrilenëve.

Goli i brazilianit, që do t’i jepte Realit një avantazh prej dy golash, u anulua pasi pamjet filmike treguan se sulmuesi i kishte tërhequr flokët një lojtari kundërshtar gjatë aksionit.

Arbitri Isidro Díaz de Mera fillimisht nuk e ndëshkoi episodin, por u thirr nga VAR-i për të rishikuar pamjet. Pas verifikimit, vendosi të anulonte golin.

Sipas të njëjtit burim, teknologjia ka korrigjuar 42 vendime fillestare në të cilat golat e Real Madridit ishin konsideruar të vlefshëm. Kjo përkthehet në afro pesë gola të anuluar në sezon, të cilët do të ishin pranuar nëse VAR-i nuk do të ishte në përdorim.