Vr'au bashkëshorten me çekiç dhe e fshehu në frigorifer, 46-vjeçari rrëfen kri'min në polici

Një video e kamerave të sigurisë në një stacion policie në Britani ka dokumentuar momentin kur 46-vjeçari David Barraclough pranoi se kishte vrarë bashkëshorten e tij 37-vjeçare, Carolan Barraclough.

Sipas dosjes hetimore, rrëfimi u bë rreth 15 ditë pas krimit. Në pamjet filmike, 46-vjeçari shihet teksa hyn në stacionin e policisë dhe fillimisht shprehet se dëshiron të kryejë vetëvrasje. Më pas, ai pranon para efektivëve: “Unë e vrava gruan time”.

Sipas prokurorisë, Barraclough e kishte vrarë bashkëshorten me çekiç, më pas i kishte lidhur trupin me shirit ngjitës, e kishte mbështjellë me një jorgan dhe e kishte futur në një frigorifer, në një dhomë të banesës së tyre.

Pas vrasjes, 46-vjeçari kishte vijuar të mashtronte familjarët, duke u dërguar mesazhe nga telefoni i viktimës, sikur ajo të ishte ende gjallë. Ai i kishte krijuar vajzës së saj përshtypjen se e ëma ndodhej në spital dhe po merrte trajtim për një sëmundje.

Sipas akuzës, pas krimit, Barraclough kishte nisur të kërkonte shërbime eskortash në internet, ishte regjistruar në aplikacionin e takimeve Tinder dhe kishte shpenzuar paratë e bashkëshortes në baret lokale.

Gjatë komunikimit me policinë, ai ishte përpjekur ta paraqiste veten si viktimë, duke pretenduar se ishte “një djalë 58 kilogramësh që askush nuk do ta besonte”.

Të premten e kaluar, Gjykata e Kurorës në Leeds e dënoi David Barraclough me 21 vjet e gjashtë muaj burg për vrasjen e bashkëshortes së tij.

Gjatë dhënies së vendimit, gjyqtari e cilësoi si cinike mënyrën se si i pandehuri ishte përpjekur të justifikonte zhdukjen e gruas.

Sipas gjykatës, Barraclough kishte sajuar një rrjetë gënjeshtrash, duke u thënë fëmijëve dhe personave të tjerë se bashkëshortja ishte e sëmurë dhe po trajtohej në spital. Ai kishte përdorur telefonin e saj për të dërguar mesazhe dhe për të ruajtur versionin e rremë të ngjarjeve, duke bërë që vajza e viktimës të besonte se po komunikonte me të ëmën.