Njëmbëdhjetë marinarë rezultojnë të zhdukur pasi dy anije në brigjet e Detit të Zi të Bullgarisë u goditën nga dronë, njëra prej të cilave u fundos, tha kryeministri bullgar Rumen Radev, duke shtuar se do të thërriste ambasadorin rus pas sulmit “të papranueshëm”, të cilin e kishte raportuar në NATO.
Një sinjal fillestar “u mor në orën 01:30 dhe kishte të bënte me një anije në vështirësi”, shkroi Radev në Facebook, duke shpjeguar se ekuipazhi i saj ishte shpëtuar. Anija, e cila mban flamurin maltez dhe i përket Ukrainës, u “godit nga tre dronë”, shtoi ai.
Pastaj “një anije tjetër u godit” dhe “u fundos”, tha kryeministri bullgar, duke shtuar se “një anëtar i ekuipazhit u shpëtua”.
“Ky sulm i ri ndaj anijeve tregtare në afërsi të ujërave territoriale bullgare është krejtësisht i papranueshëm”, tha Radev, duke shtuar se “do të flas me Sekretarin e Përgjithshëm të NATO-s, Mark Rutte”.
Sipas qeverisë bullgare, sulmi i parë ndodhi 18 milje detare në lindje të Byala-s dhe i dyti 17 milje në lindje të Krapets, dy qytete në bregdetin e Detit të Zi.
Ekuipazhi i anijes së parë, Chelsea 3 e regjistruar në Odessa, përbëhej nga shtatë ukrainas dhe tetë azerbajxhanas. Të gjithë u dërguan në portin e Varnës dhe pesë prej tyre “po marrin ndihmë mjekësore pasi kanë lëndime të lehta”.
Sipas autoriteteve bullgare, pesë anëtarë të ekuipazhit të anijes së dytë janë shpëtuar, ndërsa 11 të tjerë janë ende të zhdukur.
Media lokale raportoi se anija e mallrave ishte Azov Concord. Kompania e saj e menaxhimit me seli në Turqi nuk ka komentuar ende për incidentin.
“Nuk kemi asnjë provë të pakundërshtueshme dhe të qartë për të ngritur akuza kundër njërës palë ose tjetrës”, tha Radev, duke shtuar se, sipas autoriteteve bullgare, Rusia është përgjegjëse për sulmet.
Në X, Ministri i Jashtëm ukrainas Andriy Sybiha bëri thirrje për “rritje të presionit mbi Rusinë”, pasi Deti i Zi është një “litar shpëtimi për sigurinë globale ushqimore”.
“Rusia po sulmon atje për ta kthyer urinë në një armë dhe për ta mbajtur peng të gjithë botën”, shtoi ai.
Nga ana e saj, Presidentja e Komisionit Evropian Ursula von der Leyen dënoi sulmet dhe bëri thirrje që autorët të mbahen përgjegjës.
“Deti i Zi është bërë një tjetër front për përshkallëzimin e luftës së Rusisë në Ukrainë. Kjo është e papranueshme”, tha von der Leyen nëpërmjet Platformës X.
