Autoriteti i Mediave Audiovizive (AMA) paralajmëron për video të manipuluara me inteligjencë artificiale që po qarkullojnë në Facebook, ku përdoren pa leje imazhi dhe zëri i mjekut të njohur Flamur Topi.
Videot përdorin fragmente nga emisioni i mëparshëm “Trupi dhe shëndeti”, transmetuar në RTSH, të cilat janë manipuluar për të krijuar përshtypjen se mjeku rekomandon produkte të caktuara shëndetësore
AMA paralajmëron se këto reklama mund t’i drejtojnë qytetarët drejt faqeve mashtruese, ku rrezikojnë të japin të dhënat personale dhe bankare.
Autoriteti u bën thirrje qytetarëve të mos u besojnë verbërisht reklamave që premtojnë shërimin e sëmundjeve, të mos klikojnë lidhje të dyshimta dhe të mos ndajnë të dhëna bankare. Përmbajtjet e manipuluara mund të raportohen edhe pranë AMA-s.
Reagimi i Autoritetit të Mediave Audiovizive:
🚨 KUJDES NGA VIDEOT E MANIPULUARA!
🔴 PAS REKLAMAVE TË RREME MUND TË FSHIHEN EDHE TENTATIVA PËR MARRJEN E TË DHËNAVE BANKARE!
‼️ Autoriteti i Mediave Audiovizive (AMA) është vënë në dijeni nga familjarë të mjekut të njohur, dr. Flamur Topi, se në Facebook po qarkullojnë video që përdorin pa autorizim imazhin dhe zërin e tij.
Sipas raportimit, fragmente nga emisione të vjetra “Trupi dhe shëndeti”, të transmetuara në RTSH, janë manipuluar përmes inteligjencës artificiale, duke krijuar përshtypjen sikur dr. Flamur Topi rekomandon dhe reklamon produkte të caktuara shëndetësore.
⚠️ Por rreziku nuk qëndron vetëm te keqinformimi! Përmbajtje të tilla mund të përdoren edhe për të orientuar qytetarët drejt faqeve të dyshimta, ku rrezikojnë të ekspozojnë të dhënat e tyre personale dhe bankare.
Këto praktika shfrytëzojnë besimin e publikut te figura të njohura dhe profesionistë të respektuar, duke synuar veçanërisht qytetarët më pak të familjarizuar me teknologjinë digjitale. Materiale të tilla mund të qarkullojnë edhe si reklama të sponsorizuara.
‼️ AMA u bën thirrje qytetarëve:
✅ Verifikoni videot dhe reklamat që premtojnë shërimin e sëmundjeve, edhe kur shfaqin figura të njohura.
✅ Mos blini produkte shëndetësore pa u këshilluar me mjekun.
✅ Mos klikoni lidhje të dyshimta dhe mos jepni të dhëna personale apo bankare.
✅ Raportoni përmbajtjet e manipuluara në platformat ku publikohen dhe pranë AMA-s, në www.ama.gov.al.
❌ Jo çdo video që duket reale është e vërtetë!
Inteligjenca artificiale mund të imitojë fytyrën dhe zërin e kujtdo. Prandaj, verifikimi i informacionit është sot edhe një mënyrë për të mbrojtur veten dhe të dhënat tona.
