Te fundit
Shuarja e dënimit për Sokol Hoxhën, nëna dhe motra e dy vëllezërve Banaj: Na vranë për herë të dytë, s'na thirrën as në gjyq!
13 Tetor 2026, 15:10Kronika
TEMA
Gjykata e Fierit shuajti dënimin me 25 vite burg për Sokol Hoxhën, për vrasjen e dy vëllezërve Hektor dhe Ilirjan Banaj në Patos, ndërsa familja e dy vëllezërve shprehen të indinjuar për këtë vendim. Gjykata pranoi kërkesën e Hoxhës për parashkrimin e dënimit të dhënë në mungesë.
Një ditë pasi gjykata dha vendimin, nëna dhe motra e dy vëllezërve janë shprehur të tronditura nga ajo që e konsiderojnë një padrejtësi të rëndë. E përplotur, nëna e dy vëllezërve të vrarë ka folur për mediat, duke rikujtuar momentet e tmerrit të ditës kur mori vesh vrasjen e djemve në mars të vitit 1997 janë ende të freskëta.
“U vranë më 30 mars. Më 31 u varrosën. Më 3 qershor, Hektori mbushte 21 vjeç. Hëngrën bukë në drekë dhe dolën. Djali i vogël e dëgjoi dhe erdhi e më tha mua… E ka lënë djalin 20 muajsh. Unë e ndjeva, nuk isha mirë. Ai brodhi gjithë botën si deshi ai. Iku në moment, m’i vrau djemtë, edhe brodhi gjithë botën e nuk u bë gjë për djemtë e mi, çfarë shteti është ky? Unë jam nënë, dhe me ata fëmijë jemi bërë gjysmakë", tha nëna e viktimave.
Motra e dy vëllezërve e ka cilësuar vendimin si një goditje të dytë për familjen, duke shprehur zhgënjimin e saj ndaj drejtësisë. Ajo tha se familjarët nuk ishin thirrur në gjyqin ku u mor vendimi.
“Jemi vrarë për herë të dytë, nga vendimi që mori shteti. Dy vëllezërit e mi u vranë dhe ai të dalë i pafajshëm. Për mua, ai nuk ka bërë asnjë ditë burg. Vëllezërit e mi kanë bërë 29 vite që janë vrarë. Ku është shteti këtu?! Çfarë dënimi është hequr këtu? Ai mund edhe të mos lirohet, se ka gjëra të tjera. Unë flas për shqetësimin tim që kam si motër. Na kanë vrarë për herë të dytë, kur e mora vesh vendimin mbrëmë… Gabim që nuk na thirrën. Të ishim dhe ne palë në gjyq. Mbase ishin gabim edhe vëllezërit e mi, por vëllezërit e mi nuk ishin gabim, se ishin në punën e tyre. Të vriten dy djem në punën e tyre dhe ai të dalë i pafajshëm… Këtu nuk ka shtet. Kur u arrestua, thashë që edhe Zoti bëri një mrekulli. Gjaku me gjak lahet. Asgjë nuk u bë për ne. Të tradhtuara nga drejtësia. Ku është drejtësia këtu?!”, u shpreh motra e viktimave.
Vendimi u dha një ditë më parë nga gjyqtarja Aurora Tusha, pas kërkesës së prokurores Malbora Dinaj, e cila argumentoi se kishin kaluar afatet ligjore për parashkrimin e dënimit penal.
Megjithatë, Sokol Hoxha do të vijojë të qëndrojë në burg për llogari të autoriteteve belge, pasi ndaj tij është në fuqi një masë sigurie e vendosur më 8 tetor. Në Belgjikë, Hoxha është dënuar me burgim të përjetshëm për vrasjen e shtetases shqiptare Brunilda Dervishi, gjithashtu në vitin 1997, pasi ishte larguar nga Shqipëria. Vendimi ndaj tij mori formë të prerë në vitin 2010.
Më të lexuarat
24 oret e fundit
Javen e fundit
Blog Tema
Lini një Përgjigje