Tirana bind në derbi, trajneri i aktivizon të gjithë  

Fitorja në derbi ndaj Partizanit nuk i dha Tiranës vetëm tre pikët e rëndësishme, por nxori në pah edhe disa statistika të veçanta për skuadrën bardheblu.

Një nga të dhënat më interesante është ajo e aktivizimit të lojtarëve nga ana e trajnerit Dean Klafuric, i cili ka përdorur thuajse të gjithë organikën në këto javë të para.

Deri në këtë fazë të kampionatit, të vetmit futbollistë që nuk kanë regjistruar ende minuta në fushën e lojës janë portieri Klajdi Kuka dhe Erando Karabeci.

Pavarësisht numrit të lartë të lojtarëve të aktivizuar, shpërndarja e golave mbetet e kufizuar vetëm te pesë futbollistë. Nga 11 golat e shënuar në total nga skuadra, Redon Xhixha mban peshën kryesore të sulmit, duke kryesuar listën e ekipit me katër realizime.

Pas tij renditet Tomislav Kis me tre gola të shënuar dhe Hazrollaj, i cili ka gjetur rrugën e rrjetës dy herë.

Kësaj liste i shtohet edhe kontributi i rëndësishëm i prapavijës, ku mbrojtësit Ilievski dhe Ndong kanë realizuar nga një gol.

Ky sukses në derbi dhe këto statistika tregojnë një skuadër që mbështetet te një bërthamë e qartë lojtarësh për të shënuar, duke i dhënë Tiranës një shtysë për të synuar zonën e lartë të renditjes.