Mashtrimi i radhës nga Mero Baze për prokurorët e dosjes “Veliaj”

Mero Baze, gazetari i oborrit të Edi Ramës, i cili e ndoqi nga pas kryeministrin edhe në SHBA, njeriu që qelbte erë korridoreve të PD-së, dikur qëndronte poshtë tavolinës së Sali Berishës dhe më pas përfundoi tek Edi Rama, njeriu që vinte me bluzë të grisur te selia e Partisë Demokratike dhe sot është kthyer në miliarder, pronar hotelesh, vilash dhe apartamentesh luksoze, ka vazhduar vesin e tij të mashtrimit. "Vesi del me shpirtin" thotë populli dhe i tillë është edhe Mero Baze, një mashtrues kronik i pandalshëm.

Sot ka publikuar një shkrim në lidhje me prokurorin Ols Dado dhe prokurorin Altin Dumani. Të parin e ka sulmuar pasi, sipas tij, prokurori ka nxjerrë telefonin në seancë gjyqësore.

Artikulli në portalin "Tema"

Në fakt, të gjithë e dinë se në GJKKO nuk po zhvillohen seancat gjyqësore, mblidhen trupat gjykuese dhe thjesht dhe vetëm shtyhen çështjet.

Prokurorit Ols Dado i është nxjerrë një foto ku duket me telefon në dorë.

Foto e gjeneruar me Inteligjencë Artificiale, publikuar në portalin "Tema"

Personat e pranishëm në sallë kanë qenë gjyqtarët e prokurorët, gazetarja e TV Klan, Bleona Metushi, dhe ftuesit e seancës gjyqësore dhe përfaqësuesit e OSBE-së. Gazetarja konfirmoi për CNA se ka qenë në sallë, por nuk e ka bërë ajo atë foto. Ka dëgjuar që ka rënë një zile telefoni dhe prokurori ka futur dorën në xhep dhe e ka kthyer telefonin në “silent”.

Pyetja është e thjeshtë: Kur gazetarja ka qenë pa telefon, personat e tjerë kanë qenë pa telefon, kush e ka bërë këtë foton e Ols Dados me Altin Dumanin apo është një foto mashtrim? Sipas asaj që thotë Inteligjenca Artificiale, kjo është një foto mashtrimi e bërë me IA, pra nuk është bërë në seancë, nuk e ka bërë gazetarja, nuk e kanë bërë përfaqësuesit e OSBE-së dhe nuk e ka bërë trupa gjykuese.

Mero Baze mashtron dhe fotoja nuk është e vërtetë. Dhe nuk mjafton mashtrimi që bën për Ols Dadon me foton, por shkon edhe më tej, duke abuzuar me kërkesën e bërë nga prokurori Altin Dumani për zhvillimin e seancave gjyqësore ndaj Erion Veliajt.

Artikulli i publikuar në portalin "Tema"

Ligji e ka të qartë çfarë ndodh kur një i pandehur refuzon në mënyrë të vazhdueshme mbrojtjen dhe ka precedentë të tillë në Shqipëri që pasi caktohen avokatët kryesisht, apo ka bojkot, apo si në rastin e Veliajt, hiqen avokatë, merret peng Dhoma e Avokatëve, shtyhen seancat, vjen një palë ikën një palë, atëherë konsiderohet se është hequr dorë nga mbrojtja dhe zhvillohen seancat gjyqësore pa mbrojtje.

Kjo është një praktikë e konsoliduar dhe ka ndodhur në disa raste në Shqipëri, pra nuk ka asgjë për t'u çuditur. Por me sa duket skenaristët e mbrojtjes së Veliajt nuk e kanë menduar që prokurorët mund të shkojnë në këtë kërkesë, por kjo është një çështje që më pas e vendos gjykata.

Kemi të bëjmë sot me një mashtrim që është foto e prokurorit Ols Dado. Kemi të bëjmë edhe me mashtrimin e dytë se kanë kërkuar prokurorët që të bëjnë gjyq pa avokat.

Jo, nuk është e vërtetë. Prokurorët kanë kërkuar që të zbatohet praktika e njohur ligjore në Shqipëri, pra kur një i pandehur nuk pranon asnjë rast mbrojtjeje, quhet se e ka revokuar mbrojtjen dhe mund të zhvillohen seancat gjyqësore edhe pa mbrojtje.

Pyetja është e thjeshtë: Në rast se një kriminel heq gjykatësit, heq avokatët, ia vendosin kryesisht, i refuzon dhe ata pambarimisht, çfarë do të ndodhë? Nuk do të gjykohet?

Gjithmonë ka një zgjidhje dhe ligji është mjaft i qartë. Prandaj dhe në këtë rast kemi të bëjmë me dy mashtrime publike të bëra nga Mero Baze dhe mediat e pushtetit.

E para me foton, e dyta me faktin "kanë nxjerrë telefonin" apo "s'kanë nxjerrë telefonin", kur në fakt edhe kjo nuk është e vërtetë.

Thjesht dhe vetëm në seancë ka pasur një zile telefoni, megjithëse gazetarja e pranon që nuk ka bërë foto, megjithëse ka qenë prezente në seancë, pa pasur telefon në dorë, dhe pa folur më pas për kërkesën e prokurorit Altin Dumani, e cila është kthyer në një mashtrim tjetër publik për qytetarët.

Në rastin e fotos, më korrekt dhe serioz duket portali i Endrit Habilajt të inceneratorëve, gazetarit edhe të Mirel Mërtirit që çfarë nuk shkroi dhe nuk prodhoi në mbështetje të grupit të strukturuar kriminal që u ka vjedhur disa qindra miliona euro shqiptarëve që nga kontratat koncesionare të inceneratorëve deri tek ajo e landfillit të Tiranës.

Artikulli i publikuar në "Voxnews.al"

Të paktën edhe pse dirigjon nga arratia, Endrit Habilaj duket të jetë më korrekt pasi e citon që fotoja është e gjeneruar me Inteligjencë Artificiale. /CNA