Gjykata e Posaçme e Apelit vendosi të martën, më 13 tetor, shtyrjen e seancës për çështjen penale në ngarkim të Plaurent Dervishajt dhe Julian Meçajt, të dënuar nga Shkalla e Parë për atentatin ndaj ish-prokurorit të Durrësit, Arjan Ndoja, dhe Aleksandër Lahos, i njohur si “Rrumi”, ngjarje gjatë së cilës mbeti i vdekur Andi Maloku. Dervishaj u dënua me burgim të përjetshëm për këtë ngjarje, ndërsa Meçaj me 35 vjet heqje lirie.
Gjykata konstatoi se në sallë nuk ishin të pranishëm i pandehuri Dervishaj dhe mbrojtësit e tij. Po ashtu, u konstatua pamundësia e njoftimit të viktimës Aleksandër Laho, i njohur edhe me nofkën “Rrumi”, për datën dhe orën e zhvillimit të seancës. Prokurori i çështjes, Adnan Xholi, bëri me dije se Laho është në kërkim për një tjetër ngjarje.
Për rrjedhojë, gjykata vendosi shtyrjen e seancës dhe nuk i penalizoi të pandehurit me pezullimin e afateve të paraburgimit, me argumentin se shkaku kryesor i shtyrjes ishte mosnjoftimi i viktimës, Aleksandër Laho. Gjykata vendosi që të përsëritet njoftimi për Lahon dhe e shtyu seancën për më 28 tetor, në orën 11:00.
Prokuroria e Posaçme akuzoi Plaurent Dervishajn se, në bashkëpunim me Redjan Rrajën, Ariol Halilin, Julian Meçajn, Bledar Polovinën, Amar Shkëmbin (alias Dritan), Ramazan Rrajën, Endrit Sinanin, Genti Nderjakun, Bashkim Haxhian dhe Julian Pjetrin, kreu atentatin ndaj ish-prokurorit Ndoja, Aleksandër Lahos dhe të ndjerit Andi Maloku.
Dervishaj dhe Meçaj u gjykuan veçmas të pandehurve të tjerë, një pjesë e të cilëve janë gjykuar më parë dhe janë gjetur fajtorë. Gjykata ka dënuar për këtë vrasje Redjan Rrajën me burgim të përjetshëm dhe Ariol Halilin me 35 vjet heqje lirie. Të dënuar janë edhe Ramazan Rraja, Genti Nderjaku, Bashkim Haxhia, Endrit Sinani dhe Julian Pjetri.
Përgjatë seancave, avokati i Plaurent Dervishajt pretendoi se një prej viktimave në këtë proces, Aleksandër Laho, ka tentuar i pari të vrasë klientin e tij, pasi këtij të fundit i ishte dhënë prokurë nga të afërmit e gjyqtarit të vrarë, Skerdilajd Konomi, që t’i ndihmonte për të marrë pronat e tyre në Hamallaj të Durrësit.
Një hetim i Prokurorisë së Posaçme, ende i papërfunduar, tregon se si një grup i akuzuar për krim të organizuar, i drejtuar nga Aleksandër Laho, kontrollonte regjistrat e vjetër të pronave në arkivat e kadastrave dhe i përdori ato për të marrë nën kontroll mijëra metra katrorë tokë në bregdetin e Durrësit dhe në Tiranë, për t’ua shitur më pas të tretëve.
