Protesta e studentëve para Ministrisë së Arsimit në Tiranë vijon të shoqërohet me incidente.
Një grup protestuesish ka ndezur një zjarr në mes të rrugës, duke i vënë flakën disa kutive të kartonit dhe objekteve të tjera.
Ngjarja vjen pas përplasjeve të vazhdueshme mes protestuesve dhe forcave të policisë, të cilat kanë ndërhyrë disa herë me dhunë për të shpërndarë turmën.
Më herët, studentët u riorganizuan në zonën e Rrugës së Durrësit, duke marshuar sërish në drejtim të Ministrisë së Arsimit, pavarësisht kordonëve të sigurisë të vendosur nga policia.
Gjatë përplasjeve u raportua për hedhjen e gurëve, fishekzjarrëve dhe mjeteve të tjera drejt efektivëve, ndërsa policia përdori ujë me presion dhe spraj me piper për të shpërndarë protestuesit.
Pavarësisht ndërhyrjeve të forcave të rendit, një pjesë e studentëve kanë vijuar protestën, duke lëshuar thirrje kundër qeverisë dhe duke kërkuar përmirësimin e kushteve në arsim.
Ende nuk ka informacione zyrtare për dëmet e shkaktuara nga zjarri i ndezur në rrugë apo për persona të lënduar si pasojë e këtij incidenti.
