Gjashtë persona janë lënë në arrest me burg dhe një tjetër në arrest shtëpie. Mes të dyshuarve janë edhe dy punonjës të Policisë Kufitare, të cilët dyshohet se ndihmonin kalimin e emigrantëve drejt Malit të Zi.
Prokuroria e Posaçme kundër Korrupsionit dhe Krimit të Organizuar (SPAK), në bashkëpunim me Byronë Kombëtare të Hetimit, Policinë e Shtetit dhe Agjencinë e Mbikëqyrjes Policore, ka ekzekutuar masat e sigurisë ndaj shtatë personave të dyshuar si pjesë e një grupi të strukturuar kriminal, që organizonte kundrejt pagesës kalimin e paligjshëm të shtetasve të huaj nëpërmjet territorit shqiptar.
Në kuadër të këtij operacioni, janë kryer edhe 11 kontrolle personale dhe në banesat e personave të dyshuar. Masat e sigurisë janë caktuar nga Gjykata e Posaçme, me vendimin e datës 11 tetor 2026, në kuadër të një procedimi penal të nisur në vitin 2023.
Sipas hetimeve, grupi organizonte hyrjen e shtetasve të huaj nga Greqia, jashtë pikave zyrtare të kalimit kufitar në qarqet e Korçës dhe Gjirokastrës, dhe transportimin e tyre drejt veriut të Shqipërisë, në zonën e Hanit të Hotit, në Shkodër, me synim kalimin e mëtejshëm drejt Malit të Zi.
Gjashtë persona në burg, një në arrest shtëpie
Për gjashtë prej të dyshuarve është caktuar masa e sigurisë “Arrest në burg”, ndërsa për një shtetase është caktuar “Arrest në shtëpi”.
Katër prej personave të dyshuar akuzohen për ndihmë për kalimin e paligjshëm të kufijve me qëllim fitimi, në kuadër të një grupi të strukturuar kriminal. Një tjetër shtetas dhe një person tjetër me inicialet K.T. dyshohen për të njëjtën vepër penale, të kryer në bashkëpunim dhe duke shfrytëzuar funksionin shtetëror.
Edhe shtetasja ndaj së cilës është caktuar masa e arrestit në shtëpi dyshohet për përfshirje në veprimtarinë e grupit kriminal.
Hetimi ka nisur pas referimit të Policisë së Shtetit dhe është zhvilluar përmes informacioneve operative dhe metodave speciale të hetimit.
Emigrantët transportoheshin nga Korça dhe Gjirokastra drejt Shkodrës
Sipas SPAK, grupi kriminal organizonte transportimin e shtetasve të huaj, kryesisht me origjinë nga vendet e Lindjes së Mesme, kundrejt pagesave të ndryshme monetare.
Grupet e emigrantëve, që varionin nga 3-4 deri në 50 persona, shoqëroheshin nga organizatorë dhe transportoheshin drejt kufirit verior të Shqipërisë, ku i prisnin persona të tjerë të përfshirë në këtë veprimtari.
Nga hetimet janë evidentuar disa episode të dyshuara të transportimit të emigrantëve gjatë vitit 2024:
- 1 maj 2024: Tre shtetas të huaj u transportuan nga zona e Mëzezit në Tiranë drejt Hanit të Hotit, në Shkodër.
- 13-14 maj 2024: U transportuan 21 shtetas të huaj nga zona e Gjirokastrës drejt veriut të vendit.
- 19-21 qershor 2024: U transportuan 11 shtetas të huaj, të marrë në zonën e Korçës dhe të dërguar drejt Hanit të Hotit.
- 28 qershor 2024: 17 shtetas të huaj u transportuan nga fshati Dardhë, në Korçë, drejt zonës së Hanit të Hotit.
- 7 korrik 2024: U tentua transportimi i katër shtetasve të huaj nga qarku i Korçës drejt veriut. Shoferi u arrestua në flagrancë nga policia.
- 8-9 korrik 2024: U transportuan 12 shtetas të huaj nga zona e Jorgucatit, në Gjirokastër, drejt Malësisë së Madhe.
Dyshohet për përfshirjen e punonjësve të Policisë Kufitare
Një nga episodet e evidentuara nga hetimi lidhet me datat 8 dhe 9 korrik 2024, kur dy punonjës të Policisë Kufitare në Shkodër dyshohet se kanë ndihmuar në kalimin e emigrantëve drejt kufirit me Malin e Zi.
Një tjetër episod, i datave 23 dhe 24 korrik 2024, lidhet me transportimin e 11 shtetasve të huaj nga Bilishti drejt Tiranës dhe më pas në Hanin e Hotit.
Sipas SPAK, pasi kaluan në mënyrë të paligjshme kufirin drejt Malit të Zi, këta shtetas u ndaluan dhe u morën peng nga pesë persona me origjinë nga vendet e Lindjes së Mesme. Në bashkëpunim me autoritetet gjyqësore malazeze, u bë i mundur lirimi i tyre dhe arrestimi i tre prej pengmarrësve.
Prokuroria e Posaçme bën të ditur se hetimet vijojnë me qëllim identifikimin e të gjithë personave, shqiptarë dhe të huaj, që dyshohet se kanë qenë të përfshirë në këtë veprimtari kriminale.
Personat e përmendur në hetim prezumohen të pafajshëm deri në një vendim gjyqësor të formës së prerë.