Kryeministri Edi Rama deklaroi nga Luksemburgu se Shqipëria po vijon përparimin në procesin e integrimit europian, ndërsa sot pritet të mbyllen negociatat për Kapitullin 20, që lidhet me “Ndërmarrjet dhe Politikat Industriale”.
Në një prononcim për mediet, pas mbërritjes në Qendrën Europiane të Konventave, Rama e cilësoi këtë një tjetër hap drejt anëtarësimit në Bashkimin Europian, duke theksuar se synimi historik i Shqipërisë mbetet i pandalshëm.
“U kthyem edhe një herë për të mbyllur një tjetër kapitull dhe për të rikonfirmuar që përparimi drejt objektivit tonë historik është i pandalshëm. Ndërkohë, sapo kam kryer disa takime inkurajuese për çfarë vjen më pas. Pra, planet janë ambicioze, brenda këtij viti synojmë të mbyllim edhe më shumë kapituj”, u shpreh kryeministri.
Rama tha se pala shqiptare synon të përmbushë plotësisht afatet e përcaktuara në procesin e negociatave, ndërsa shprehu optimizëm për hapat e ardhshëm.
I pyetur se sa kapituj pritet të mbyllen deri në fund të vitit, kreu i qeverisë nuk dha një shifër konkrete, por theksoi se objektivat janë ambicioze.
“Thjesht po them se sot do të mbyllim edhe një tjetër kapitull, që bëhen katër gjithsej dhe kanë mbetur së paku edhe dyfish që pritet të jetë shifra për këtë vit. Por le të shohim”, deklaroi Rama.
Mbyllja e Kapitullit 20 shënon një tjetër etapë në negociatat e Shqipërisë me Bashkimin Europian, ndërsa qeveria synon të përshpejtojë procesin dhe të avancojë më tej me kapitujt e mbetur.