Kimberly Guilfoyle ka dhënë dorëheqjen të martën nga posti i ambasadores së Shteteve të Bashkuara në Greqi, pasi The Wall Street Journal raportoi se ajo kishte kërkuar 100 mijë dollarë nga një donator i Donald Trump, pak ditë para seancës së konfirmimit të saj vitin e kaluar.

Në një reagim në rrjetin social X, Guilfoyle e cilësoi detyrën si një nder të jashtëzakonshëm, duke falënderuar presidentin Trump dhe sekretarin e Shtetit, Marco Rubio.

Sipas gazetës, Guilfoyle i kishte kërkuar Eric Deters, donator i Trump dhe ish-kandidat për Kongresin, që të transferonte shumën në llogarinë e saj American Express. Mesazhet e shqyrtuara nga gazeta sugjerojnë se ajo kishte përmendur lidhjet e saj me administratën Trump dhe kishte ofruar të lobonte pranë Shërbimit të të Ardhurave të Brendshme (IRS) dhe Departamentit të Drejtësisë në emër të tij. Deters nuk e kreu pagesën.

Guilfoyle i ka mohuar akuzat, duke deklaruar se ato janë të pavërteta dhe se do të mbrojë fuqishëm emrin dhe reputacionin e saj. Avokati i saj ka kundërshtuar autenticitetin e mesazheve, duke pretenduar se asaj i detyroheshin para për aktivitete të zhvilluara para emërimit, ndërsa Deters ka mohuar se kishte ndonjë detyrim financiar ndaj saj.