Policia e Shtetit ka dhënë detaje për incidentet e dhunshme gjatë protestës së zhvilluar mesditën e sotme pranë Ministrisë së Arsimit në Tiranë. Sipas njoftimit zyrtar, 23 persona janë shoqëruar për veprime të mëtejshme procedurale, ndërsa nga përplasjet kanë mbetur të lënduar gjashtë punonjës policie dhe një gazetare.
Sipas policisë, disa prej protestuesve kanë dëmtuar fillimisht rrethimin e jashtëm dhe portën hyrëse të ministrisë, në përpjekje për të hyrë në oborrin e institucionit. Ata dyshohet gjithashtu se kanë goditur me gurë dhe sende të forta xhamat dhe fasadën e godinës.
Policia pretendon se, pavarësisht thirrjeve për të ndaluar veprimet dhe për t’u larguar nga oborri, protestuesit kanë vijuar përplasjet, duke goditur efektivët me molotovë, kapsolla, gurë dhe sende të forta.
Përballë situatës, strukturat e policisë ndërhynë, me qëllim neutralizimin e personave të përfshirë dhe rivendosjen e rendit, ndërsa shoqëruan 23 persona.
Të gjashtë efektivët e Forcës Kombëtare të Sigurisë dhe gazetarja e lënduar ndodhen jashtë rrezikut për jetën, bëri të ditur Policia e Shtetit.