Shoferi 45-vjeçar shqiptar, i cili shkaktoi aksidentin e rëndë në një lokal në Selanik, është liruar nga qelia. Gjykata ka vendosur që ai të qëndrojë i lirë, me kushtin që të mos largohet nga vendi.
Seanca e radhës gjyqësore është shtyrë për javën e ardhshme, kur pritet të dëshmojnë edhe personat që kanë qenë të pranishëm në momentin e aksidentit.
Ndaj 45-vjeçarit janë ngritur akuza për drejtim të rrezikshëm të automjetit, shkaktim të lëndimeve trupore nga pakujdesia dhe drejtim të mjetit nën efektin e alkoolit.
Ngjarja ndodhi rreth orës 01:10 të mëngjesit të së dielës, në zonën e Evosmosit, kur automjeti i drejtuar nga shqiptari doli nga rruga dhe u fut brenda një lokali, duke përplasur tavolina dhe klientë.
Si pasojë e përplasjes, tre persona mbetën të plagosur dhe u transportuan në spital për të marrë ndihmë mjekësore.
Sipas dëshmitarëve okularë, vazot e vendosura përgjatë perimetrit të lokalit mund të kenë ndihmuar në ndalimin e automjetit.
