Situatë e rënduar në protestën studentore në Tiranë, ku policia ka nisur ndërhyrjen ndaj protestuesve, duke hedhur gaz lotësjellës, hedhur ujë më autobote dhe duke kryer arrestime të dhunshme, raportuan gazetarët e SYRI TV, Fiona Çela dhe Elkjer Bushkolaj nga terreni.

Gazetarët e SYRI TV kanë raportuar nga terreni për përshkallëzimin e situatës, teksa strukturat e policisë janë afruar drejt protestuesve dhe ndërhyrja ka sjellë shpërndarjen e një pjese të tyre në rrugicat përreth.

‘Po kemi këtu një situatë dramatike, me struktura policore që përdoren kundër të gjithë atyre protestuesve’, raportohet gjatë transmetimit live në SYRI TV.

Gazetarët në terren përshkojnë vështirësitë për të lëvizur në zonë, duke bërë me dije se ndodhej mes dy autoboteve, ndërsa në vendngjarje ishin pozicionuar edhe mjete zjarrfikëse dhe autobote uji.

‘Momentalisht situata është shumë e rënduar, numri më i madh i protestuesve tani është shpërndarë. Arrij të shoh një pjesë të protestuesve janë shpërndarë nëpër rrugicat, në të cilat u bënë arrestime të dhunshme’, raportoi SYRI TV.

Sipas raportimit, ndërhyrja e policisë ishte e papritur dhe në të morën pjesë forca të shumta policore. Situata në terren mbeti e tensionuar, ndërsa një pjesë e protestuesve u larguan nga zona kryesore e përplasjes.