“Bashkia e Tiranës nuk ishte parashikuar”, Karamuço: Protestuesit po shpërndahen në grupe të vogla

Profesori i Kriminalistikës, Ervin Karamuço, komentoi protestën që po zhvillohet prej më shumë se shtatë orësh në Tiranë, duke e cilësuar situatën si të vështirë për t’u menaxhuar nga policia. Sipas tij, shpërndarja e protestuesve në grupe të vogla drejt institucioneve të ndryshme e ka vështirësuar reagimin e forcave të rendit.

I ftuar në emisionin “Now” në Euroneës Albania, Karamuço u shpreh se numri i efektivëve të angazhuar nuk ka qenë i mjaftueshëm për të mbuluar njëkohësisht të gjitha zonat ku janë regjistruar incidente.

Ai u ndal veçanërisht te sulmi ndaj Bashkisë së Tiranës, duke pretenduar se policia nuk e kishte parashikuar këtë institucion si një nga objektivat e protestuesve.

“Situata është e pamenaxhueshme pasi grupe të vogla që po shpërndahen nëpër disa institucione nuk mbulohen të gjitha nga policia, numri është dispororcional. Policia mbërriti më vonë se shkatërrimi i derës së bashkisë tiranë. Ishte jashtë zonës së  saj të mbulimit, nuk e kishte parashikuar policia bashkinë tiranë, pasi asnjëherë nuk ishte sulmuar në kaq muaj, është një situatë e radikalizuar përtej çdo parashikimi të bërë nga policia. Sot nuk ishte parashikuar një protestë e tillë, ishte menduar si protesta e studentëve në 2018”, tha Karamuço.