Shakira nuk arriti t’i mbante emocionet gjatë koncertit të saj të fundit në Madrid, ku, mes lotësh, foli hapur për periudhën e vështirë që ka kaluar dhe falënderoi fansat për mbështetjen e tyre.
Këngëtarja kolumbiane, 49 vjeçe, përmbylli më 12 tetor rezidencën e saj muzikore në kryeqytetin spanjoll, pas një serie koncertesh që mblodhën qindra mijëra spektatorë. Mbrëmja e fundit u shndërrua në një moment veçanërisht emocional, teksa artistja reflektoi mbi ndryshimet që kjo periudhë ka sjellë në jetën dhe karrierën e saj.
Ky ka qenë një nga muajt më të rëndësishëm të karrierës sime
-u shpreh Shakira para publikut, duke pranuar se rrugëtimi nuk kishte qenë i lehtë.
Pas suksesit të turneut, këngëtarja është përballur edhe me shqetësime personale, veçanërisht lidhur me gjendjen shëndetësore të të atit. Këto vështirësi e kanë bërë periudhën edhe më të ndërlikuar për të, pavarësisht suksesit të madh profesional.
Gjatë koncertit, Shakira shprehu mirënjohjen për fansat, të cilët, sipas saj, i kanë dhënë forcë për të vazhduar përpara edhe në momentet më të vështira.
Ajo falënderoi gjithashtu ish-partnerin e saj, Antonio de la Rúa, për mbështetjen gjatë kësaj etape të rëndësishme dhe për kontributin në realizimin e projektit të saj në Madrid.
Rezidenca muzikore në Madrid ishte një nga projektet më të rëndësishme të Shakirës gjatë këtij viti. Përmes turneut “Las Mujeres Ya No Lloran”, artistja ka sjellë në skenë jo vetëm hitet e saj më të njohura, por edhe përvojat personale që kanë ndikuar në muzikën e saj vitet e fundit.
Në koncertin përmbyllës, ajo u shoqërua nga emra të njohur të muzikës, mes tyre Maluma, Bizarrap, Laura Pausini dhe Dani Martín, duke e kthyer mbrëmjen në një festë të muzikës dhe kulturës latine.
Për Shakirën, ky kapitull duket se përfaqëson më shumë se një sukses artistik. Emocionet e shfaqura në skenë treguan se, pas një periudhe të mbushur me sfida personale, mbështetja e publikut mbetet një nga burimet e saj më të rëndësishme të forcës.
