Protestuesit e shoqëruar në Komisariatin nr.1 dhe nr.2 gjatë protestës së zhvilluar të enjten në Tiranë janë liruar gjatë natës, sipas raportimeve. Mbi 40 persona u shoqëruan nga policia pas përplasjeve të regjistruara gjatë tubimit përpara Ministrisë së Arsimit.
Protesta u organizua nga qindra studentë, të cilët kërkuan llogari për premtimet e pambajtura që prej vitit 2018, kur mijëra të rinj dolën në rrugë për të kërkuar përmirësimin e kushteve në arsimin e lartë.
Tubimi u shoqërua me tensione dhe përplasje fizike mes protestuesve dhe forcave të policisë. Si pasojë, disa persona mbetën të lënduar, mes tyre edhe gazetarë.
Ndër rastet më të rënda është ai i 19-vjeçarit Ledjon Balla, i cili u dërgua në spital në gjendje të fikti dhe me këmbë të thyer. Sipas raportimeve, i riu u lëndua gjatë ndërhyrjes së policisë. Ndihmë mjekësore mori gjithashtu edhe një përfaqësues diplomatik, i cili pësoi dëmtime në kokë.
Protesta nisi përpara Ministrisë së Arsimit, por situata u përshkallëzua gjatë zhvillimit të saj, duke çuar në përplasje mes demonstruesve dhe policisë.
