9 orë akte dhune, 16 protestues të arrestuar dhe 49 nën hetim! Sulm Bashkisë, Ministrisë së Arsimit dhe bizneseve! Policia: Efektivët u qëlluan me gurë e molotovë (VIDEO+EMRAT)

Policia e Tiranës thotë se 16 protestues janë arrestuar pas akteve të dhunës në protestën e një dite më parë, ndërsa 49 të tjerë janë vënën nën hetim. Të arrestuarit akuzohen për “Goditje për shkak të detyrës”, “Prishja e rendit dhe qetësisë publike”, “Shkelja e rregullave mbi lëndët plasëse dhe djegëse”, “Vjedhja e bankave dhe arkave të kursimit”, “Shkatërrimi i pronës”, “Shkatërrimi i pronës me zjarr”, “Kundërshtimi i punonjësit të rendit publik” dhe “Prodhimi, mbajtja, blerja apo shitja pa leje e armëve të ftohta”.

Policisë thotë se protestuesit e maskuar sulmuan efektivët me gurë, kapsolla dhe molotovë, dëmtuan kangjellat, muret dhe xhamat e Ministrisë së Arsimit, shkatërruan bankomate e biznese, si dhe thyen derën e Bashkisë së Tiranës, ku i vunë zjarrin katit të parë duke ndezur një flakadan. 

Njoftimi i plotë i Policisë së Tiranës

Ushtruan dhunë ndaj punonjësve të Policisë, dëmtuan institucione shtetërore dhe subjekte private, si dhe shkatërruan bankomate, kamera dhe rrethime metalike gjatë tubimit të datës 13.10.2026, arrestohen në flagrancë 16 shtetas.

Procedohen penalisht 49 shtetas të tjerë.

Gjatë tubimit të zhvilluar më datë 13.10.2026, rreth orës 14:00, përpara Ministrisë së Arsimit, disa pjesëmarrës të maskuar kanë ushtruar akte dhune, duke hedhur sende të forta, pllaka guri, kapsolla, kokteje molotovi dhe sende të tjera në drejtim të punonjësve të Policisë, institucioneve shtetërore, subjekteve private dhe ambienteve publike.

Si pasojë e akteve të dhunës, janë dëmtuar kangjellat rrethuese, muret dhe dritaret e godinës së Ministrisë së Arsimit, si dhe kangjellat e trotuareve, tabelat e reklamave dhe sinjalistika rrugore. Gjithashtu, janë thyer dhe djegur sende brenda një institucioni mikrofinanciar, dhe është dëmtuar fasada prej xhami e subjektit privat, bankë e nivelit të dytë. 

Në rrugën “Ded Gjon Luli”, është thyer me forcë një nga dyert e godinës së Bashkisë Tiranë dhe i është vënë zjarri katit të parë të saj.

Gjatë gjithë tubimit, punonjësit e Policisë të planëzuar me shërbim janë përballur, që prej fillimit të tij, me dhunë të vazhdueshme, përmes hedhjes së gurëve, sendeve të forta, kapsollave dhe koktejeve molotovë nga grupe pjesëmarrësish të maskuar. Si pasojë, janë dëmtuar 6 punonjës policie.

Në vijim të veprimeve për dokumentimin ligjor të akteve të dhunës dhe vënien para përgjegjësisë ligjore të autorëve, nën drejtimin e Prokurorisë së Tiranës, pas kryerjes së veprimeve procedurale:

U bë arrestimi në flagrancë i shtetasve K. V., 41 vjeç; F. B., 48 vjeç; A. B., 40 vjeç; G. I., 57 vjeç; E. K., 32 vjeç; I. S., 38 vjeç; B. K., 59 vjeç; D. V., 55 vjeç; E. Z., 30 vjeç; H. B., 52 vjeç; O. V., 35 vjeç; Xh. P., 27 vjeç; K. M., 23 vjeç; B. Gj., 31 vjeç; K. H., 38 vjeç dhe K. A., 32 vjeç, për veprat penale “Goditje për shkak të detyrës”, “Prishja e rendit dhe qetësisë publike”, “Shkelja e rregullave mbi lëndët plasëse dhe djegëse”, “Vjedhja e bankave dhe arkave të kursimit”, “Shkatërrimi i pronës”, “Shkatërrimi i pronës me zjarr”, “Kundërshtimi i punonjësit të rendit publik” dhe “Prodhimi, mbajtja, blerja apo shitja pa leje e armëve të ftohta”.

U proceduan penalisht 49 shtetas të tjerë.

Grupi hetimor, në bashkëpunim me Prokurorinë, vijon punën për identifikimin e personave të tjerë të përfshirë në akte dhune ndaj punonjësve të Policisë, institucioneve shtetërore dhe subjekteve private, si dhe për dokumentimin e plotë ligjor të veprimeve të kundërligjshme të kryera gjatë tubimit të datës 13.10.2026.

Materialet procedurale iu referuan Prokurorisë së Tiranës për veprime të mëtejshme.

Kryeqyeti dje përjetoi 9 orë kaos, ku  protestues të maskuar sulmuan institucione, shkatërruan biznese dhe u përplasën me Policinë. 

Protesta e cila nisi dje para Ministrisë së Arsimit, e cilësuar si 'e thirrur' nga studentët' agravoi në dhunë deri në orët e darkës.

Në një nga pamjet që Report Tv ka siguruar, shihet se protestuesit e maskuar kanë hipur edhe në një fadromë,

Teksa kanë hequr një tabelë reklamash, protestuesit e tjerë duartrokasin dhe brohorasin.

Report Tv sjell pamjet që tregojnë pasojat e sulmit të dhunshëm ndaj Ministrisë së Arsimit gjatë protestës së djeshme në Tiranë. Oborri është mbushur me gurë e pllaka trotuari të shkulura, ndërsa disa xhama të Ministrisë janë thyer.

Në vijën e parë të sulmeve ishin protestues me fytyra të mbuluara, të cilët hodhën gurë, pllaka trotuari dhe sende të forta drejt godinës. Ata shkulën edhe kangjellat dhe sulmuan portën, duke arritur të futen në oborrin e Ministrisë.