Grupi do të drejtohet nga Glauk Konjufca dhe do të bashkërendojë angazhimin institucional, juridik dhe diplomatik për procedurat e Apelit në Dhomat e Specializuara. Kryeministri Albin Kurti e cilësoi aktgjykimin e shkallës së parë ndaj katër ish-krerëve të UÇK-së si të padrejtë.
Qeveria e Kosovës ka miratuar propozim-vendimin për themelimin e një grupi punues që do të hartojë dhe bashkërendojë strategjinë shtetërore në lidhje me procedurat e Apelit ndaj katër ish-krerëve të Ushtrisë Çlirimtare të Kosovës (UÇK), të cilët po gjykohen në Dhomat e Specializuara në Hagë.
Lajmin e bëri të ditur kryeministri Albin Kurti gjatë mbledhjes së Qeverisë, duke theksuar se synimi është bashkërendimi i përpjekjeve institucionale në mbështetje të procesit të Apelit.
Sipas Kurtit, aktgjykimi i shkallës së parë ndaj ish-krerëve të UÇK-së është i padrejtë nga pikëpamja juridike dhe morale, ndërsa, sipas tij, përmban edhe pasaktësi juridike e historike.
Kryeministri theksoi se përpjekjet për kundërshtimin e këtij aktgjykimi në shkallën e Apelit kërkojnë një strategji shtetërore që tejkalon dallimet politike dhe siguron bashkëpunimin ndërmjet institucioneve.
“Për këtë arsye sot po themelojmë grupin punues, të kryesuar nga Glauk Konjufca, me përfaqësim institucional dhe parlamentar, për të bashkërenduar mbështetjen juridike, institucionale dhe diplomatike në funksion të procedurave të Apelit”, deklaroi Kurti.
Grupi punues do të ketë për detyrë hartimin, harmonizimin dhe koordinimin e strategjisë shtetërore për këtë çështje, me përfshirjen e përfaqësuesve të institucioneve dhe të Kuvendit.
Sipas kryeministrit, vendimi synon të konkretizojë zotimin e Qeverisë për të shfrytëzuar mekanizmat në dispozicion në funksion të drejtësisë dhe mbrojtjes së asaj që ai e cilësoi si të vërtetën historike të luftës çlirimtare.
Propozim-vendimi për themelimin e grupit punues u miratua në mbledhjen e Qeverisë së Kosovës.