Kryeministri i Kosovës, Albin Kurti, ka përkujtuar 80-vjetorin e themelimit të Teatrit Kombëtar të Kosovës, duke e cilësuar këtë institucion si një prej shtyllave kryesore të jetës kulturore dhe të artit skenik në vend.
Gjatë fjalës së mbajtur për këtë përvjetor, Kurti tha se historia e teatrit nisi në Prizren, në vitin 1946, ndërsa më vonë vazhdoi në Prishtinë. Sipas tij, ndër vite aty u krijua një traditë e rëndësishme teatrale, e cila u përcoll, u zhvillua dhe u pasurua nga breza të shumtë artistësh.
Të lidhura
None found
Kryeministri nënvizoi se rrugëtimi i institucionit është shoqëruar edhe me vështirësi, veçanërisht gjatë viteve të ’90-ta, kur artistët shqiptarë u përjashtuan nga institucionet dhe u përballën me kufizime të lirisë krijuese. Megjithatë, ai tha se dëshira për të krijuar dhe për ta mbajtur gjallë kulturën nuk u shua asnjëherë.
Kurti e përshkroi 80-vjetorin si një moment për të nderuar jo vetëm historinë e Teatrit Kombëtar të Kosovës, por edhe të gjithë njerëzit që e themeluan, e mbajtën gjallë, e zhvilluan dhe vazhdojnë ta çojnë përpara.
Në fjalën e tij, kryeministri iu drejtua drejtorit të Teatrit Kombëtar të Kosovës, Kushtrim Mehmeti, ministres së Kulturës dhe Turizmit, Saranda Bogujevci, kryeshefes së Postës së Kosovës, Nora Raci, përfaqësuesve të institucioneve, artistëve, komunitetit teatror dhe të gjithë të pranishmëve.
Ai tha se kjo skenë, përgjatë tetë dekadave, ka sjellë vepra dhe interpretime që kanë lënë gjurmë në kulturën e Kosovës, ndërsa ka krijuar një raport të veçantë me publikun.
Kurti shprehu mirënjohje për të gjithë komunitetin teatror të Kosovës, përfshirë aktorët, regjisorët, dramaturgët, skenografët, kostumografët, muzikantët, si dhe punonjësit teknikë e administrativë.
Ai vlerësoi talentin, frymëzimin, punën dhe përkushtimin e tyre, duke theksuar se kontributi i këtyre profesionistëve ka mundësuar vazhdimësinë dhe përparimin e teatrit ndër vite.
Kryeministri deklaroi se ruajtja e kësaj trashëgimie dhe krijimi i kushteve për zhvillimin e mëtejshëm të institucionit janë përgjegjësi e përbashkët. Sipas tij, në Teatrin Kombëtar të Kosovës po investohen mbi shtatë milionë euro.
Me përfundimin e punimeve, synimi është që teatrit t’i ofrohet një pamje e rinovuar dhe kushte dukshëm më të mira, duke u ruajtur njëkohësisht autenticiteti i tij. Kurti theksoi se Teatri Kombëtar nuk është vetëm një hapësirë e artit, por edhe pjesë e trashëgimisë kulturore të vendit.
Ai shtoi se Qeveria e Republikës së Kosovës dhe Ministria e Kulturës dhe Turizmit do të vijojnë ta mbështesin krijimtarinë artistike dhe zhvillimin e institucioneve kulturore.
Sipas Kurtit, synimi është që teatri të mbetet një skenë e hapur për ide të reja, artistë të rinj dhe publikun. Ai tha se, duke e bërë kulturën sa më artistike dhe artin pjesë të kulturës së shoqërisë, sfera publike shndërrohet në një shkollë të hapur për edukimin estetik të qytetarëve.
Kryeministri e vendosi teatrin në qendër të këtij procesi, duke e përshkruar si artin që e mëson dhe e shqyrton më së miri raportin e secilit me tjetrin, si dhe rikthimin e njeriut te vetja.
“Tetëdhjetë vjet janë një histori e çmuar, por edhe përgjegjësi për të ardhmen”, u shpreh Kurti.
Në përfundim, ai uroi 80-vjetorin e Teatrit Kombëtar të Kosovës dhe dëshiroi që institucioni të ketë edhe shumë dekada të tjera përpara, suksese të mëdha, krijimtari cilësore dhe sa më shumë takime të bukura me publikun.
Kurti e mbylli urimin me dëshirën që publiku të mbetet njerëzor, ndërsa njerëzit të cilëve teatri u drejtohet të bëhen publik i tij, duke thënë: “Gëzuar dhe faleminderit!”.
