Mijëra e mijëra studentë vërshuan në rrugët e Tiranës të mërkurën, duke u vënë flakën një godine qeveritare dhe dy bankave, si dhe duke qëlluar me gurë ndaj policisë, gjatë një proteste kundër rritjes së kostove të arsimit dhe korrupsionit.
Policia u përgjigj me autobote uji dhe gaz lotsjellës për të shpërndarë protestuesit, të cilët i vunë flakën godinës së Ministrisë së Arsimit, përmbysën kazanët e mbeturinave dhe thyen fasadat e bizneseve lokale, siç treguan pamjet e Reuters.
Një degë e Raiffeisen Bank pranë Ministrisë së Arsimit u përfshi gjithashtu nga flakët, sipas një dëshmitari të Reuters.
Protestat përfaqësojnë shpërthimin më të dhunshëm të pakënaqësisë kundër kryeministrit Edi Rama, i cili fitoi mandatin e katërt në zgjedhjet e majit të vitit të kaluar, por që prej atëherë është përballur me një pakënaqësi në rritje për shkak të korrupsionit të perceptuar në radhët e zyrtarëve të lartë. Protestuesit i konsiderojnë gjithashtu figurat e opozitës si alternativa të papranueshme.
Trazirat vijnë pas një vere protestash paqësore kundër Ramës, të nxitura nga projekti për ndërtimin e një resorti luksoz përgjatë bregdetit të paprekur të jugut të Shqipërisë, i mbështetur nga dhëndri i presidentit amerikan Donald Trump, Jared Kushner, projekt që është përfshirë në mosmarrëveshje ligjore.
“Ky është një revolucion. Jemi lodhur nga protestat paqësore. Nuk do të ndalemi derisa Rama të japë dorëheqjen”, tha Lora, një studente që nuk pranoi të jepte mbiemrin e saj, ndërsa qëllonte me gurë drejt policisë.
Protestues të tjerë brohorisnin “Dorëheqje” dhe “Policia e krimit”.
PROTESTA MË TË GJERA
Organizatorët studentorë thanë se protesta lidhej me kushtet në universitete, kostot më të larta të arsimit të lartë, mungesën e mbështetjes financiare dhe perspektivën e punësimit pas diplomimit.
Trazirat janë pjesë e një vale më të gjerë aktivizmi studentor që po përfshin Evropën, për shkak të problemeve me arsimin dhe kushtet e jetesës. Në Francë, nxënësit e shkollave të mesme kanë zhvilluar prej javësh protesta dhe bllokime të shkollave, duke kërkuar më shumë mësues dhe kushte më të mira. Ata argumentojnë se përkeqësimi i gjendjes së godinave shkollore dhe mbipopullimi i klasave po dëmtojnë cilësinë e arsimit.
Mediat shqiptare raportuan se protestat e së mërkurës u përhapën edhe në universitetet e Elbasanit dhe Shkodrës.
Qeveria e dënoi dhunën.
“Protesta është një e drejtë legjitime, por ajo nuk mund të përdoret si justifikim për dhunë, shkatërrimin e qytetit apo përleshje të shëmtuara në mes të rrugës”, shkroi zëvendëskryeministrja Albana Koçiu në Facebook.
“U bëj thirrje studentëve dhe çdo qytetari të ndershëm që beson në të drejtën e protestës: Distancohuni nga dhuna dhe vandalizmi!”, shtoi ajo.
Edhe policia publikoi një deklaratë, duke bërë thirrje për qetësi.
“Çdo person që ushtron dhunë, djeg apo shkatërron pronën, ose sulmon punonjësit e Policisë, mban përgjegjësi individuale dhe do të përballet me ligjin, në përputhje me veprat penale të kryera”, thuhej në deklaratën e policisë.
