Presidentja e Kosovës, Justina Shiroka Pula, ka vlerësuar rolin e KFOR-it në ruajtjen e paqes dhe stabilitetit në vend, duke theksuar se misioni i NATO-s vazhdon të ketë rëndësi të veçantë në arkitekturën e sigurisë së Kosovës.
Deklaratat u bënë gjatë ceremonisë së ndërrimit të komandës së KFOR-it, ku presidentja nënvizoi se, që nga viti 1999, misioni ka qenë pjesë e rëndësishme e rrugëtimit të Kosovës drejt forcimit të institucioneve dhe konsolidimit të sigurisë.
“Historia e Kosovës është, në një pjesë të rëndësishme të saj, histori e partneritetit me aleatët tanë”, u shpreh Shiroka Pula, duke theksuar se bashkëpunimi me partnerët ndërkombëtarë mbetet i rëndësishëm për stabilitetin e vendit dhe perspektivën e tij euroatlantike.
Presidentja: Institucionet e sigurisë kanë avancuar
Shiroka Pula tha se, me mbështetjen e partnerëve ndërkombëtarë, Kosova ka ndërtuar dhe fuqizuar institucionet e saj të sigurisë, të cilat sot kanë përgjegjësi të drejtpërdrejtë për reagimin ndaj sfidave dhe mbrojtjen e qytetarëve.
Sipas saj, përparimi në profesionalizëm, kapacitete dhe përgjegjësi dëshmon rezultatet konkrete të partneritetit ndërkombëtar.
Ajo theksoi se bashkëpunimi i ngushtë me KFOR-in mbetet i rëndësishëm, ndërsa prania dhe mandati i misionit kontribuojnë në sigurinë e përgjithshme dhe në besimin e qytetarëve.
Presidentja shprehu gjithashtu mirënjohje për ushtarakët dhe pjesëtarët e shteteve kontribuuese që kanë shërbyer në kuadër të KFOR-it që nga viti 1999, duke vlerësuar përkushtimin e tyre dhe sakrificat e bëra larg familjeve.
Anëtarësimi në NATO, synim strategjik i Kosovës
Gjatë fjalës së saj, Shiroka Pula ritheksoi se anëtarësimi në NATO mbetet një synim strategjik i Kosovës.
“Synimi ynë strategjik për anëtarësim në NATO mbetet i qartë. Ne synojmë që, një ditë, Kosova të mos jetë vetëm përfituese e sigurisë, por edhe kontribuuese e drejtpërdrejtë në të”, deklaroi ajo.
Presidentja theksoi se Kosova synon të jetë pjesë e përpjekjeve të përbashkëta ndërkombëtare për paqe dhe siguri, përfshirë misionet ndërkombëtare, në përputhje me statusin dhe detyrimet që do të kishte si anëtare e ardhshme e NATO-s.
Në përfundim, ajo falënderoi gjeneralmajorin Ulutaş për shërbimin dhe bashkëpunimin e tij, ndërsa gjeneralmajorit Vergori i uroi suksese në detyrën e re, duke shprehur gatishmërinë e institucioneve të Kosovës për të vijuar bashkëpunimin e ngushtë me KFOR-in.
Ndërrimi i komandës, sipas presidentes, përbën një mundësi për të riafirmuar vazhdimësinë e partneritetit mes Kosovës dhe misionit të NATO-s, në funksion të ruajtjes së paqes dhe sigurisë në vend.