14 punonjës të Policisë së Shtetit janë plagosur gjatë protestës së zhvilluar në Tiranë, ndërsa 35 persona janë shoqëruar deri më tani. Shifrat janë bërë publike nga Policia e Shtetit, e cila u ka bërë thirrje pjesëmarrësve të distancohen nga aktet e dhunës.
Në reagimin zyrtar, policia u kërkon protestuesve të ndalojnë sulmet ndaj efektivëve dhe institucioneve shtetërore, si dhe shkatërrimin me zjarr të pronës publike dhe private.
“Rrezikimi i jetës së punonjësve të Policisë dhe të qytetarëve duhet të marrë fund menjëherë”, thuhet në njoftim.
Policia u ka bërë gjithashtu thirrje pjesëmarrësve të distancohen nga personat e maskuar dhe ata që ushtrojnë dhunë, duke theksuar se e drejta për të protestuar është e garantuar me ligj, por nuk justifikon sulmet apo dëmtimin e pronës.
Ndërkohë, shërbimet policore po vijojnë punën për identifikimin dhe shoqërimin e personave të dyshuar për përfshirje në aktet e dhunës, përfshirë ata që janë maskuar gjatë tubimit.
“Përgjegjësit për këto akte do të identifikohen dhe do të përballen me ligjin”, përfundon reagimi i Policisë së Shtetit.