Policia e Shtetit njofton se 14 punonjës të saj janë plagosur si pasojë e sulmeve të ndodhura gjatë protestës në Tiranë. Deri në këto momente, sipas policisë, janë shoqëruar 35 persona të dyshuar për akte dhune.
Në një deklaratë për mediat, uniformat blu u kanë bërë thirrje pjesëmarrësve në tubim të distancohen nga personat e maskuar dhe të ndalojnë sulmet ndaj efektivëve, institucioneve shtetërore dhe pronës publike e private.
Policia thekson se incidentet kanë vijuar prej disa orësh, duke vënë në rrezik jetën e punonjësve të saj dhe të qytetarëve. Sipas saj, ushtrimi i së drejtës për të protestuar nuk justifikon aktet e dhunës apo shkatërrimin e pronës.
Ndërkohë, shërbimet e Policisë po vijojnë identifikimin dhe shoqërimin e personave që dyshohet se kanë kryer akte dhune ose janë maskuar gjatë tubimit.
