Forcat e policisë kanë nisur shoqërimet e protestuesve në Bulevardin “Dëshmorët e Kombit”, përballë Kryeministrisë.
Të rinjtë shihen teksa tërhiqen zvarrë nga efektivët, ndërsa edhe vajza janë shoqëruar me forcë.
Protesta e studentëve dhe gjimnazistëve ka nisur që në orët e para të mëngjesit. Në disa shkolla të mesme është bojkotuar mësimi, me nxënësit që kanë lënë klasat për t’iu bashkuar tubimit në kryeqytet.
Protesta nuk është kufizuar vetëm në Tiranë. Tubime janë zhvilluar edhe në qytete të tjera të vendit, përfshirë Vlorën, Durrësin, Korçën dhe Shkodrën.
