Kreu i Partisë Demokratike, Sali Berisha, ka përsëritur thirrjen për dorëheqjen e kryeministrit Edi Rama, në një tjetër deklaratë për mediat, në ditën e tretë të protestave të studentëve.
Berisha deklaroi se Partia Demokratike do të vijojë të mbështesë protestuesit dhe se, sipas tij, asnjë provokim nuk do ta ndryshojë këtë qëndrim.
Gjatë fjalës së tij, kreu i opozitës iu drejtua drejtpërdrejt kreut të qeverisë, duke përdorur si referencë fatin e ish-diktatorit rumun Nicolae Çaushesku dhe ish-udhëheqësit komunist shqiptar Ramiz Alia.
“Jam këtu për të paralajmëruar Edi Ramën se asnjë provokacion, asnjë akt i tij, policisë së tij kriminale dhe shërbimit të tij, nuk do të mund të cenojë mbështetjen e plotë dhe totale të PD-së, anëtarëve dhe mbështetësve të saj në mbarë Shqipërinë për protestën studentore”, u shpreh Berisha.
Më tej, ai i kërkoi Ramës të zgjedhë atë që e cilësoi si fatin e Ramiz Alisë, duke e mbyllur deklaratën me një kërkesë të prerë: “Rrugë tjetër nuk ka. Të japë dorëheqjen”.
