Një tjetër kioskë është djegur nga protestuesit në Bulevardin Dëshmorët e Kombit. Tymi i zi ka mbuluar zonën.
Pas kioskës së djegur, disa pemë në ‘Bulevardin Dëshmorët e Kombit’ janë përfshirë nga flakët e vëna nga protestuesit.
Shkatërrim, plaçkitje, akte guerile. Panorama e protestës në ditë e tretë është e njëjtë, me protestues të maskuar që po shkatërrojnë gjithçka që u del para. Prej orës 09:00 të mëngjesit, protestuesit po lëvizin nëpër Tiranë duke sulmuar disa prej institucioneve dhe policëve, me gurë e sende të forta, ndërsa nuk kanë munguar as fishekzjarrët.
Pre e sulmit ka rënë Kryeministria, Kuvendi, Bashkia e Tiranës, 3 ministri, Arsimi, Ekonomia e Infrastruktura, por edhe teatri i Kukullave apo muzeu Shtëpia e Gjetheve. Protestuesit tentuan edhe një sulm ndaj selisë së PS-së, por s’ia dolën. Pas disa orësh orovajtje nëpër rrugët e Tiranës, të gjitha grupet e protestuesve janë mbledhur te Kryeministria. Protestuesit hodhën fishekzjarrë ndërsa policia reagoi me gaz lotsjellës.
Në krye të dhunës janë të maskuarit, të cilët kanë shkatërruar çdo gjë në rrugë, semaforë, tabela, kamera, kangjella e deri te sulmet e ashpra ndaj bizneseve e bankave të cilat janë plaçkitur. Ndryshe nga një ditë më parë, policia po vepron me tjetër strategji, duke i shpërndarë menjërë protetsuesit me gaz sapo iu afrohen institucioneve.
Disa prej protestuesve janë shoqëruar, ndërsa nga sulmet kanë mbetur të plagosur 14 persona, nga të cilët 6 janë ende në spital, 2 prej të cilëve policë.
Aktet e dhunës nga protestuesit e maskuar nisën prej mëngjesit në rrugën e Elbasanit, ku u shkatërruan tabela, semaforë dhe koshave iu vu flaka në mes të rrugës. Ndonëse seanca plenare u anulua, një grup protestuesish u ndalën fillimisht te Kuvendi, por policia nisi menjëherë me shoqërimet e para.
