Asociacioni i Gazetarëve të Shqipërisë ka reaguar lidhur me sulmin e bërë ndaj gazetares së Top Channel, Doriana Bezat, gjatë protestës së sotme në Tiranë.
AGSH e ka cilësuar këtë sulm si pjesë e një serie shqetësuese sulmesh, kërcënimesh dhe pengesash ndaj gazetarëve dhe punonjësve të medias gjatë protestave të ditëve të fundit.
Në reagimin e sa, AGSH thekson se gazetarët nuk nuk janë palë në protesta dhe duhet të jenë të lirë të raportojnë zhvillimet pa u përballur me agresion apo kërcënime.
Reagimi i plotë:
AGSH dënon sulmin ndaj gazetares së Top Channel, Doriana Bezat, nga protestuesit në Tiranë
Asociacioni i Gazetarëve të Shqipërisë (AGSH) dënon sulmin e raportuar ndaj gazetares së Top Channel, Doriana Bezat, nga protestues gjatë ditës së tretë të protestave në Tiranë, më 15 tetor 2026. Ky incident i shtohet një serie shqetësuese sulmesh, kërcënimesh dhe pengimesh ndaj gazetarëve dhe punonjësve të medias gjatë protestave të ditëve të fundit. Gazetarët nuk janë palë në protesta dhe duhet të jenë të lirë të dokumentojnë zhvillimet pa u përballur me agresion apo kërcënime.
AGSH shpreh solidaritetin e plotë me gazetaren Doriana Bezat dhe kërkon nga autoritetet identifikimin e personave përgjegjës, hetimin e rrethanave të sulmit dhe marrjen e masave përkatëse ligjore. Njëkohësisht, u bëjmë thirrje organizatorëve dhe pjesëmarrësve në protesta të respektojnë integritetin fizik dhe profesional të gazetarëve, ndërsa Policisë së Shtetit i kërkojmë të garantojë sigurinë e ekipeve mediatike. Me këtë rast, numri i incidenteve të raportuara dhe të dokumentuara nga AGSH gjatë tri ditëve të protestave, 13–15 tetor, arrin në të paktën 11.
Përsëritja e këtyre ngjarjeve përbën një shqetësim serioz për lirinë e medias dhe sigurinë e gazetarëve në Shqipëri.
