Teksa protesta vijon përshkallëzimin në Tiranë dhe qytetet e tjera, me dhunë, shkatërrim e përleshje, Presidenti Bajram Begaj iu drejtohet për të dytën ditë radhazi protestuesve për dialog. Kreu i Shtetit bën thirrje që të gjendet një zgjidhje në interes të qytetarëve. “Zëri i çdo qytetari meriton të dëgjohet, veçanërisht zëri i të rinjve, të cilët përfaqësojnë shpresën dhe të ardhmen e vendit tonë. Këtë s’mund ta verë dhe nuk e vë askush në diskutim. Me përgjegjësinë dhe tagrat që më jep Kushtetuta, mbetem i hapur për këdo që dëshiron të ketë një hapësirë dialogu dhe mirëkuptimi sikurse i bëj thirrje aktorëve të përfshirë t’i përkushtohen dialogut dhe bashkëpunimit, në të mirë të rinisë, në të mirë të Shqipërisë. Ka nevojë që dallimet të mos na përçajnë, por të na nxisin të dëgjojmë njëri-tjetrin dhe të gjejmë zgjidhje në interes të qytetarëve dhe të Shqipërisë”. Për Presidentin Begaj dhuna është e papranueshme dhe dëmton gjithë shoqërinë, ndaj sipas tij, të gjithë duhet të tregojnë maturi.