Tensionet në protestën në Tiranë janë përshkallëzuar në bulevardin “Dëshmorët e Kombit”, ku protestues të maskuar kanë djegur kioska, kosha mbeturinash dhe tabela reklamash, ndërsa i kanë vënë flakën edhe hyrjes së Ministrisë së Ekonomisë dhe Inovacionit. Zjarri në godinën e ministrisë u shua nga ndërhyrja e zjarrfikësve.
Pas dëmtimit të disa bizneseve në rrugën e Elbasanit, protestuesit dogjën një kioskë në bulevard, e cila u përfshi nga flakët dhe lëshoi shtëllunga të mëdha tymi. Ata dogjën gjithashtu një pishë përgjatë bulevardit, ndërsa më vonë vandalizmi u zhvendos edhe në zonën përreth parkut “Rinia”.
Përballë përshkallëzimit të situatës, Policia përdori disa herë gaz lotsjellës dhe ujë me presion për të shpërndarë turmën. Efektivët krijuan gjithashtu një gardh përpara Kryeministrisë, me qëllim pengimin e afrimit të protestuesve.
Nga ana tjetër, disa prej tyre hodhën mjete piroteknike në drejtim të forcave të rendit, duke shkaktuar përplasje të mëtejshme. Policia ndërhyri sërish, me gaz lotsjellës dhe ndërhyrje fizike për të neutralizuar protestuesit.
Episodet e dhunës vijuan edhe në kryqëzimin e rrugës “Dëshmorët e 4 Shkurtit” me rrugën “Myslym Shyri”, ku u dogjën kosha mbeturinash dhe kioska.
Protesta e të rinjve, gjatë gjithë ditës, është shoqëruar me akte vandalizmi dhe dëmtime të pronës private e publike në disa zona të kryeqytetit, ndërsa përplasjet me policinë kanë vijuar në disa pika të Tiranës.