Presidenti amerikan Donald Trump deklaroi se dëshiron që dënimi me vdekje të zbatohet edhe ndaj personave që shpallen fajtorë për vrasjen e zjarrfikësve, duke zgjeruar thirrjet e tij për ndëshkime maksimale ndaj autorëve të sulmeve kundër punonjësve të shërbimeve publike.
Deklarata u bë gjatë një dreke të organizuar në Kopshtin e Trëndafilave të Shtëpisë së Bardhë, në nder të organizatave të zjarrfikësve.
Trump tha gjithashtu se kishte udhëzuar Ministrinë e Drejtësisë që të kërkonte dënimin me vdekje në raste të tilla, duke theksuar se masa duhet të përfshijë këdo që vret një zjarrfikës.
Qëndrimi i tij vjen pas deklaratave të mëparshme në favor të dënimit me vdekje për personat që shpallen fajtorë për vrasjen e oficerëve të policisë.
Megjithatë, zbatimi i dënimit me vdekje në SHBA rregullohet nga kuadri ligjor federal dhe ai i shteteve, ndaj deklaratat politike nuk nënkuptojnë automatikisht ndryshim të ligjit apo zbatim të menjëhershëm të kësaj mase.