Protestuesit janë zhvendosur drejt Drejtorisë së Policisë në rrugën “Myslym Shyri” në Tiranë, por janë përballur me një postbllok të ngritur nga efektivët.
Pasi kanë bërë rezistenë për pak minuta duke tentuar të sulmojnë drejtorinë e policisë, protestuesit janë përballur me postobllokun e policëve dhe janë detyruar të largohen nga zona.
Situata në kryeqytet vijon të jetë e tensionuar, ndërsa automjete të shumta policie patrullojnë në zona të ndryshme, pasi protestuesit lëvizin herë pas here në pika të ndryshme të Tiranës.
Protesta ka nisur që në orët e mëngjesit dhe është shoqëruar me akte dhune e dëmtime të pronës publike dhe private. Gjatë tubimit, protestuesit kanë sulmuar institucione shtetërore dhe biznese private, si dhe kanë djegur stola, kioska dhe kosha mbeturinash.
Gjithashtu, protestuesit kanë hedhur gurë dhe sende të forta në drejtim të policisë, ndërsa efektivët janë kundërpërgjigjur me ujë me presion dhe gaz lotsjellës.
