Këngëtarja e njohur shqiptare, Elvana Gjata, ka reaguar përmes një mesazhi në InstaStory lidhur me protestat e studentëve në Tiranë, duke shprehur shqetësimin për situatën në vend dhe përplasjet mes protestuesve dhe policisë.
Artistja iu drejtua si drejtuesve të vendit, ashtu edhe të rinjve që kanë dalë në rrugë për të kërkuar të drejtat e tyre, duke bërë thirrje për dialog dhe protesta pa dhunë.
“Pse duhet të vijmë gjithmonë në këtë pikë?”, shkroi Gjata, duke ngritur shqetësimin për përshkallëzimin e situatës.
Elvana Gjata thirrje qeverisë: Dëgjoni kërkesat e të rinjve
Në reagimin e saj, këngëtarja u bëri thirrje qeverisë dhe drejtuesve të vendit që t’u kushtojnë vëmendje kërkesave të të rinjve dhe të krijojnë hapësirë për një dialog të sinqertë.
Ajo theksoi rëndësinë e dëgjimit të studentëve pa paragjykime dhe pa kushte, duke kërkuar që palët të angazhohen seriozisht për gjetjen e një zgjidhjeje.
Sipas artistes, zëri i të rinjve duhet të dëgjohet dhe shqetësimet e tyre të trajtohen me përgjegjësi.
“Protesto, por mos shkatërro!”
Në pjesën përmbyllëse të mesazhit, Elvana Gjata iu drejtua drejtpërdrejt protestuesve, duke i nxitur të vazhdojnë të shprehin pakënaqësitë dhe të mbrojnë të drejtat e tyre, por pa përdorur dhunë dhe pa shkaktuar dëme.
“PROTESTO! ULËRIT! FRYMËZO! BASHKOHU NË PROTESTË QYTETARE! Por mos shkatërro! Mos digj! Mos dhuno!”, ishte thirrja e këngëtares.
Ajo e mbylli reagimin duke vënë theksin te rëndësia e të rinjve për të ardhmen e vendit.
“Rinia është e ardhmja dhe meriton të ardhmen e artë!”, përfundoi Elvana Gjata, duke përcjellë mesazhin se protestat qytetare duhet të shërbejnë për të kërkuar ndryshim, pa u shoqëruar me dhunë apo shkatërrime.