Kryetari i Lëvizjes Shqipëria Bëhet, Adriatik Lapaj, deklaroi se zgjidhja për krizën politike në vend duhet të jetë sistemike dhe jo thjesht zëvendësimi i një politikani me një tjetër.
I ftuar në emisionin “Opinion” në Tv Klan, Lapaj u shpreh se sistemi zgjedho, sipas tij, duhet të reformohet për të garantuar përfaqësim të drejtë dhe për të shmangur atë që e cilësoi si një sistem të bazuar “te hilet”.
Sipas tij, kryeministri Edi Rama duhet të japë dorëheqjen si hap për të ndihmuar në qetësimin e situatës në vend.
Ai theksoi gjithashtu se Parlamenti duhet t’i nënshtrohet një reforme të Kodit Zgjedhor, me qëllim krijimin e një sistemi elektoral që garanton përfaqësim të drejtë.
Lapaj kërkoi edhe krijimin e një qeverie tranzitore me mandat 12-mujor, e cila, sipas tij, do të përgatisë vendin për zgjedhje.
“Nuk bëhet fjalë që të ikë njëri dhe të vijë tjetri. Zgjidhja duhet të jetë sistemike. Ky sistem karburant të vetëm ka votën. Në momentin që ti deformon llojin e karburantit, ai nuk punon, ka defekt. Sistemi zgjedhor ka qenë sistem hilesh. Na duhet sistem elektoral që nuk prodhon më këtë lloj zhbalancimi.
Atij që është në krye i takon të bëjë tërheqjen më të madhe, që do të thotë se, për t’u paqtuar vendi, duhet të japë dorëheqjen. Kjo nuk negociohet më, e ka të panegociueshme këtë.
Ai parlament, me hir ose pa hir, duhet t’i nënshtrohet një reforme të Kodit Zgjedhor për të gjetur një ligj elektoral që të krijojë përfaqësim të drejtë. Na duhet qeveri tranzitore me një mandat 12-mujor për ta përgatitur vendin për zgjedhje. Ne duam ta shërojmë Shqipërinë, ajo shërohet duke mos ia pasur me hile njëri-tjetrit.“, tha ai.
