Shkodra, Lezha dhe Elbasani janë zgjuar me protesta. Të rinj, gjimnazistë dhe studentë, kanë bojkotuar mësimin duke dalë në rrugë për të protestuar. Po kështu në Burrel e Gramsh.
Ndërkohë, në Lezhë ka pasur tensione mes protestuesve dhe policisë, ku palët janë përplasur fizikisht. Në drejtim të një gjimnazi u hodhën gurë. Më pas, bluve iu dha urdhër të tërhiqen dhe të shmangin përplasjet me të rinjtë.
Në Tiranë, protestuesit u grumbulluan para Bankës së Shqipërisë rreth orës 11:00. Sot dita e katërt e protestës antiqeveritare në kryeqytet.
Kryeministri Edi Rama fajësoi opozitën dhe aktorë të huaj për përshkallëzimin e dhunës gjatë protestave studentore në Tiranë, duke i cilësuar trazirat si një përpjekje për të penguar përparimin e Shqipërisë drejt Bashkimit Europian.
Duke folur nga një kioskë e shkrumbuar gjatë protestave, Rama u përpoq të distanconte studentët nga aktet e dhunës që kanë shoqëruar demonstratat e ditëve të fundit, ndërsa akuzoi kundërshtarët politikë se po shfrytëzonin pakënaqësinë e të rinjve për qëllimet e tyre.
