Gjimnazistët e Kamzës kanë dalë sërish në protestë këtë të premte, duke bojkotuar mësimin dhe duke marshuar në rrugë në shenjë kundërshtimi ndaj situatës politike në vend.
“Pas flamurit të gjithë” dhe “Shqipëria kërkon revolucion” janë thirrjet që shoqërojnë tubimin e të rinjve, të cilët kanë vijuar protestën edhe gjatë ditës së sotme.
Nxënësit janë nisur në drejtim të Tiranës me synimin për t’iu bashkuar protestës në kryeqytet, por marshimi i tyre është ndaluar nga Policia. Në zonë është konstatuar prani e shtuar e forcave të rendit, ndërsa deri më tani nuk raportohen përplasje mes efektivëve dhe protestuesve.
Protesta në Kamëz zhvillohet në ditën e katërt të mobilizimit të studentëve dhe gjimnazistëve, të cilët kanë bojkotuar mësimin dhe kanë dalë në rrugë edhe në qytete të tjera të vendit.