Bashkimi Evropian në Kosovë ka reaguar pas miratimit të Ligjit për parandalimin e pastrimit të parave në lexim të dytë nga Kuvendi i Kosovës. Në reagimine e BE-së, thuhet se Kosova përmes këtij vendimi shënon një hap para drejt anëtarësimit në SEPA. “Me miratimin e Ligjit për parandalimin e pastrimit të parave në lexim të dytë nga Kuvendi dje, Kosova ka bërë një hap tjetër drejt anëtarësimit në Zonën e Vetme të Pagesave në Euro (SEPA) dhe integrimit gradual në Tregun e Përbashkët të BE-së”, tha ambasadori i BE-së në Kosovë, Dirk Schuebel. Më tej diplomati e konsideron vendimin si një lajm të mirë. Schuebel theksoi se pasi Kosova të anëtarësohet në SEPA, pagesat dhe transfertat e parave drejt dhe nga vendet e zonës SEPA do të bëhen më të lehta, më të shpejta dhe më të lira, duke u kursyer bizneseve dhe qytetarëve kohë dhe para. Me 61 vota pro, asnjë kundër dhe asnjë abstenim është miratuar më 15 tetor projektligji për ndryshimin dhe plotësimin e ligjit për parandalimin e pastrimit të parave dhe luftimin e financimit të terrorizmit. Në votimin e këtij projektligji të pranishëm ishin vetëm deputetët e Lëvizjes Vetëvendosje, ndërkohë që votimi u mbajt pa prezencën e PDK, LDK, Listës Serbe e Aleancës.