Deputetja socialiste Elisa Spiropali i bëri thirrje të premten kryeministrit Edi Rama të mos e trajtojë revoltën studentore si një problem të rendit publik, por si shprehje të një krize të thellë besimi ndaj qeverisjes, që kërkon zgjidhje politike.
Në një letër të hapur drejtuar Ramës, Spiropali argumenton se protestat janë pasojë e pakënaqësive të akumuluara ndaj korrupsionit, klientelizmit, pabarazisë ekonomike dhe mungesës së përfaqësimit politik.
“Dhuna nuk mund të jetë rruga e ndryshimit politik. Por as shuarja e zjarrit nuk mund të jetë përgjigjja ndaj krizës”, shkruan ajo.
Spiropali i kujton Ramës se shumica parlamentare nuk e përjashton nga detyrimi për të dhënë llogari.
“82 mandatet nuk janë mandat për të mos dhënë llogari. Janë përgjegjësi për të qeverisur edhe për ata që nuk na kanë votuar”, thekson ajo.
Ish-ministrja kërkon hapjen e një dialogu kombëtar për reformën zgjedhore, ndarjen e partisë nga shteti dhe demokratizimin e institucioneve, duke mos përjashtuar rotacionin politik apo zgjedhjet e parakohshme.
Apeli shënon një tjetër distancim publik të Spiropalit nga Rama, pas përkeqësimit të marrëdhënieve mes tyre gjatë vitit 2026.
Dikur ndër mbrojtëset më të zëshme të kryeministrit, Spiropali u shkarkua nga posti i ministres së Jashtme në shkurt dhe mbeti deputete e PS-së. Në prill, ajo u përplas publikisht me Ramën pas paralajmërimeve për përjashtimin e saj nga grupi parlamentar.
Në korrik, Spiropali propozoi një mocion për një “Marrëveshje të Re për Shqipërinë”, ndërsa më 8 tetor kundërshtoi kërcënimet me përjashtim ndaj deputetëve socialistë që votojnë ndryshe nga shumica.
