Zbuten tensionet, protestuesit rikthehen në bulevard (VIDEO)

Pasi marshuan për rreth një orë e 30 minuta në rrugët e Tiranës, ku dogjën kosha mbeturinash, protestuesit janë rikthyer sërish në bulevardin “Dëshmorët e Kombit”.

Këtë herë, ndryshe nga përplasjet e mëparshme, situata është qetësuar mes protestuesve dhe policisë. Disa prej protestuesve kanë përqafuar efektivët dhe i kanë duartrokitur.

Në këto momente, protestuesit po bisedojnë me policët, ndërsa të dyja palët po komunikojnë në mënyrë paqësore.

Gjatë këtij momenti qetësie, protestuesit u kërkojnë efektivëve t’i lejojnë të lëvizin në drejtim të Kryeministrisë, duke u thënë se nuk e kanë me policinë.

Megjithatë, protestuesit vijojnë të brohorasin: “Rama, jepe dorëheqjen!”.

Një nga protestuesit tha për mikrofonin e Euronews: “Ne po hamë gaz, policët po hanë gurë, ndërsa politikanët mish.”