Një 34-vjeçar shqiptar është gjetur i pajetë në parkingun e klubit të natës “Vision Club”, në Verucchio të Italisë, vetëm pak metra larg kufirit me San Marinon. Rrethanat e vdekjes mbeten të paqarta, ndërsa hetuesit po përpiqen të zbardhin se çfarë ka ndodhur.
Trupi u zbulua rreth orës 23:30 të mbrëmjes, pasi një kalimtar vuri re burrin të shtrirë në asfalt dhe ndaloi një patrullë të Xhandarmërisë së San Marinos që po kalonte pranë zonës. Viktima kishte plagë në fytyrë.
Pas sinjalizimit, u njoftuan autoritetet italiane dhe shërbimet e urgjencës. Pavarësisht ndërhyrjes së ekipeve mjekësore, 34-vjeçari nuk mundi të shpëtohej.
Tri pista për vdekjen
Në vendngjarje kanë ndërhyrë karabinierët, specialistët hetimorë të Riminit dhe mjeku ligjor. Hetuesit po shqyrtojnë disa mundësi: një problem të papritur shëndetësor, një rrëzim aksidental ose një sulm të mundshëm.
Plagët në fytyrë janë një prej elementeve që po verifikohen, por ende nuk dihet nëse janë shkaktuar nga një rënie apo nga ndonjë veprim tjetër. Deri në përfundimin e ekzaminimeve, asnjë prej pistave nuk është përjashtuar.
Autoritetet po rindërtojnë gjithashtu lëvizjet e fundit të shqiptarit dhe arsyen pse ndodhej në parkingun e klubit të natës. Deri tani, nuk është konfirmuar ndonjë lidhje mes aktivitetit të lokalit dhe vdekjes së tij.
Kishte shkuar në Itali për të punuar
Sipas informacioneve të publikuara nga mediat italiane, 34-vjeçari kishte mbërritur prej pak kohësh në Itali së bashku me partneren e tij, me synimin për të nisur një jetë të re. Ai kishte gjetur një mundësi punësimi në sektorin e ndërtimit, në provincën e Forli-Cesenës.
Shqiptari nuk kishte ende një vendbanim të regjistruar në zonë. Sipas të dhënave paraprake, ai nuk rezultonte me precedentë penalë.
Përgjigjet për shkaqet e vdekjes pritet të jepen nga autopsia, e cila është planifikuar të kryhet sot. Ekzaminimi mjekoligjor do të ndihmojë në përcaktimin nëse bëhet fjalë për vdekje natyrale, pasojë të një rrëzimi apo traumë me origjinë tjetër.
Deri atëherë, vdekja e 34-vjeçarit shqiptar mbetet e mbuluar nga pikëpyetjet.
