Kryeministri Edi Rama ka prezantuar sot dritaren “Dëmi im” në platformën E-Albania, përmes së cilës bizneset e vogla të dëmtuara gjatë protestave të katër ditëve të fundit do të mund të regjistrojnë dëmet dhe të aplikojnë për dëmshpërblim.
Përmes një videoje të publikuar në llogarinë e tij në Facebook, Rama shpjegoi mënyrën e funksionimit të platformës. Sipas tij, bizneset duhet të plotësojnë të dhënat përkatëse, përfshirë NIPT-in dhe vlerësimin paraprak të dëmit, si dhe të ngarkojnë fotografi dhe dokumentacion tjetër që vërteton dëmtimet.
Kryeministri bëri të ditur gjithashtu se 10 grupe verifikimi nga administrata tatimore do të dalin në terren për të mbledhur të dhëna dhe për të verifikuar dëmet e shkaktuara ndaj bizneseve të vogla.
“Dritarja quhet ‘Dëmi im’ dhe këtu mund të regjistroheni duke futur të dhënat, NIPT-in, parashikimin e dëmit dhe pastaj do të ngarkoni dokumentet, që janë pamjet dhe çdo dokumentacion tjetër. Pasi të bëjmë të gjitha verifikimet, do të mbledhim një regjistër të të gjitha dëmeve dhe patjetër do t’ju vijmë në ndihmë”, u shpreh Rama.
Kreu i qeverisë deklaroi se synimi është që bizneset e prekura të marrin mbështetjen e nevojshme për të rikuperuar dëmet.
“Do t’i kthejmë këto gërmadha verbërie në shëmbëlltyra të forcës sonë për të ecur përpara”, përfundoi Rama.