Kryeministri Edi Rama ka reaguar sërish lidhur me protestat e studentëve, duke lënë të qartë se thirrjet për dorëheqjen e tij nuk do të sjellin largimin nga detyra.
Në reagimin e tij, kreu i qeverisë u shpreh se e drejta e studentëve për të protestuar do të respektohet dhe se zëri i tyre duhet të dëgjohet. Megjithatë, ai theksoi se nuk do të tolerohen akte dhune apo shkatërrime, të cilat i cilësoi si veprime që mund të dëmtojnë të ardhmen e vendit.
Rama vijoi akuzat ndaj opozitës, duke pretenduar se pas situatës qëndrojnë edhe interesa të jashtme që, sipas tij, synojnë të pengojnë zhvillimin e Shqipërisë.
Një tjetër çështje e trajtuar në reagimin e kryeministrit ishte dëmi i shkaktuar në bizneset e vogla në Tiranë. Ai bëri të ditur se do të ngrihen grupe për të evidentuar dëmet, ndërsa përmes platformës e-Albania do të vihet në dispozicion një hapësirë e posaçme me emrin “Dëmi im”.
Përmes kësaj dritareje, bizneset e prekura do të kenë mundësi të regjistrojnë dëmet e pësuara dhe të dorëzojnë dokumentacionin e nevojshëm për të përfituar dëmshpërblimin.
