Shoqata Shqiptare për Psikoterapinë shprehu shqetësimin për denoncimet dhe pamjet e dhunës policore ndaj të rinjve dhe të miturve gjatë protestave antiqeveritare të ditëve të fundit, duke paralajmëruar se përvoja të tilla mund të shkaktojnë pasoja afatgjata psikologjike dhe të cenojnë besimin tek institucionet.
Në një deklaratë publike, shoqata theksoi se ekspozimi ndaj dhunës, poshtërimit dhe trajtimit degradues është veçanërisht shqetësues për fëmijët dhe adoleshentët, të cilët ndodhen në një fazë të ndjeshme të zhvillimit të identitetit dhe marrëdhënies me autoritetin.
“Frika, poshtërimi dhe përvoja e pafuqisë mund të cenojnë besimin te të tjerët dhe tek institucionet, veçanërisht kur dhuna ushtrohet nga persona të ngarkuar me mbrojtjen e qytetarit”, thuhet në deklaratë.
Reagimi vjen pas disa ditësh protestash studentore dhe qytetare në Tiranë dhe qytete të tjera të Shqipërisë, të shoqëruara me përplasje mes protestuesve dhe policisë, arrestime dhe denoncime për përdorim joproporcional të forcës nga efektivët e rendit.
Shoqata dënoi dhunën ndaj çdo personi, përfshirë punonjësit e policisë, por nënvizoi se autoritetet shtetërore kanë përgjegjësi të veçantë për mbrojtjen e qytetarëve, sidomos kur ata ndodhen nën kontrollin e tyre.
“As tensioni i situatës, as shkeljet e dyshuara nga një qytetar nuk justifikojnë ndëshkimin fizik apo poshtërimin e tij”, theksoi shoqata.
Organizata kërkoi hetim të shpejtë, të pavarur dhe transparent të pretendimeve për dhunë policore, duke përfshirë përgjegjësinë individuale të efektivëve dhe atë të drejtuesve të tyre. Ajo kërkoi gjithashtu ndihmë juridike, kujdes mjekësor dhe mbështetje psikologjike për personat e prekur, si dhe mbrojtje të posaçme për të miturit.
Shoqata kritikoi edhe gjuhën stigmatizuese ndaj protestuesve të rinj, duke paralajmëruar se etiketimi kolektiv dhe retorika kërcënuese mund të thellojnë mosbesimin ndaj institucioneve.
“Institucionet duhet të tregojnë, me veprime të verifikueshme, se qytetari është i mbrojtur edhe kur kundërshton, edhe kur dyshohet se ka shkelur ligjin, edhe kur ndodhet plotësisht në duart e shtetit”, përfundon deklarata.
