LIVE-Dita e 5-të e protestës, përplasje të ashpra në vend. Policia qëllon me plumba gome, RENEA rrethon Kryeministrinë

Situata në protestën e sotme vijon të jetë e tensionuar, me përplasje të forta mes protestuesve dhe policisë. Sipas pamjeve nga terreni, një grup protestuesish kanë shtyrë një automjet drejt kordonit policor, përballë ndërtesës së Kryeministrisë, me qëllim çarjen e kordonit, ku më pas, automjetit i kanë vënë flakën.

Sipas raportimeve nga terreni, bëhet e ditur se një grup protestuesish këtë automjet e kanë marrë të parkuar në një shesh pushimi pas Kullave Binjake dhe e kanë nxjerrë deri në Bulevardin Dëshmorët e Kombit, ku edhe i kanë vënë flakën.

Përplasjet kanë vijuar me hedhjen e gurëve në drejtim të efektivëve të policisë, të cilët janë detyruar të tërhiqen disa metra pas.

Përballë kësaj situate dhe hedhjes së vazhdueshme të gurëve dhe vendosjes së flakëve të makinës, forcat e policisë janë kundërpërgjigjur duke hedhur një sasi të madhe gazi lotsjellës, me qëllim shpërndarjen e turmës.

Disa të rinj janë lënduar gjatë protestës, pasi dyshohet se janë qëlluar me plumba gome. Në vendngjarje ka mbërritur një ambulancë, e cila u ka dhënë ndihmën e parë protestuesve të lënduar.

Sipas pamjeve nga terreni, të rinjtë kanë pasur shenja goditjeje në pjesë të ndryshme të trupit.

Mbërritja e ambulancës është shoqëruar me tensione, pasi protestuesit kanë ndaluar automjetin dhe e kanë kontrolluar atë. Ky veprim lidhet me dyshimet e ngritura një ditë më parë se gazi lotsjellës mund të ishte hedhur edhe nga automjete të ambulancës.

Pas kontrollit, ambulanca është larguar nga vendngjarja me një protestues të lënduar brenda, për t’i ofruar ndihmën e nevojshme mjekësore.

Gjatë tensioneve të shënuara ditën e sotme të protestës, ajo çfarë është deklaruar nga një protestues është se ka pësuar një goditje që ai pretendon se është bërë me plumb gomë. Ai thotë së është qëlluar nga ana e policisë në kraharor.

Policia ndërkaq pretendon se plumbat janë plumba shpërqendrues.

Plumbi shpërqendrues është një lloj municioni që përdoret për të shpërndarë ose zmbrapsur turmat gjatë protestave. Mund të jetë prej gome, plastike ose materialesh të tjera.

Edhe pse konsiderohet më pak vdekjeprurës se plumbi i zakonshëm, mund të shkaktojë plagë të rënda, dëmtime të organeve, humbje të shikimit dhe deri në vdekje.

Situata në kryeqytet vazhdon të mbetet e tensionuar, me përplasje të ashpra përgjatë Rrugës së Durrësit. Protestuesit vijojnë të hedhin gurë në drejtim të policisë e cila më pas është kundërpërgjigjur me gaz lotsjellës.

Policia ka ndërhyrë me dy autobotë me ujë, në përpjekje për të shpërndarë protestuesit dhe për të vënë situatën nën kontroll. Protestuesit shpërndahen për pak çaste por rikthehen sërish duke sulmuar me gurë efektivët e policisë.

Situata në kryeqytet vazhdon të mbetet e tensionuar, me përplasje të ashpra përgjatë Rrugës së Durrësit. Protestuesit vijojnë të hedhin gurë në drejtim të policisë e cila më pas është kundërpërgjigjur me gaz lotsjellës.

Policia ka ndërhyrë me dy autobotë me ujë, në përpjekje për të shpërndarë protestuesit dhe për të vënë situatën nën kontroll. Protestuesit shpërndahen për pak çaste por rikthehen sërish duke sulmuar me gurë efektivët e policisë.

Situata në kryeqytet vazhdon të mbetet e tensionuar, me përplasje të ashpra përgjatë Rrugës së Durrësit. Protestuesit vijojnë të hedhin gurë në drejtim të policisë e cila më pas është kundërpërgjigjur me gaz lotsjellës.

Policia ka ndërhyrë me dy autobotë me ujë, në përpjekje për të shpërndarë protestuesit dhe për të vënë situatën nën kontroll. Protestuesit shpërndahen për pak çaste por rikthehen sërish duke sulmuar me gurë efektivët e policisë.

Situata në kryeqytet vazhdon të mbetet e tensionuar, me përplasje të ashpra përgjatë Rrugës së Durrësit. Protestuesit vijojnë të hedhin gurë në drejtim të policisë e cila më pas është kundërpërgjigjur me gaz lotsjellës.

Policia ka ndërhyrë me dy autobotë me ujë, në përpjekje për të shpërndarë protestuesit dhe për të vënë situatën nën kontroll. Protestuesit shpërndahen për pak çaste por rikthehen sërish duke sulmuar me gurë efektivët e policisë.

Situata para Ministrisë së Arsimit vijon e tensionuar, teksa policia ka hedhur gaz lotsjellës. Siç shihet edhe nga pamjet, “Rruga e Durrësit” është ‘pushtuar’ nga tymi ndërsa protestuesit janë larguar duke u shpërndarë përkohëshisht.

Gjithashtu një numër i madh protestuesish kanë nisur marshimin teksa ende nuk dihet se cili do të jetë intinerari. Pas pak minutash marshim deri te “Rruga e Kavajës”, protestuesit janë rikthyer për të shkuar drejt “Rrugës së Durrësit” ku ndodhe ministria e Arsimit.

Tensionet janë regjistruar sërish para Ministrisë së Arsimit. Policia e Shtetit ka ndërhyrë në terren duke hequr barrierat e vendosura nga protestuesit në rrugë.

Ata gjithashtu kanë hedhur edhe gaz lotsjellës që ka sjellë që të rinjtë dhe protestuesit të shpërndahen përkohësisht. Pasi u larguan përkohësisht, protestuesit janë rikthyer duke hedhur gurë në drejtim të policëve.

Situata përpara Ministrisë së Arsimit është përshkallëzuar në tensione. Të rinjtë u kanë vënë flakën koshave të mbeturinave para Ministrisë së Arsimit.

Efektivët ndodhen në terren por nuk kanë ndërhyrë ndaj protestuesve. Koshat vijojnë të digjen teksa protestuesit janë të qetë dhe ndryshe nga ditët e mëparshme nuk kanë hedhur gurë në drejtim të policisë.

Kreu i Partisë Demokratike, Sali Berisha në një bashkëbisedim me qytetarët në rrjetet sociale ka folur lidhur me protestën studentore që po zhvillohet prej 5 ditësh në Tiranë. Berisha i ka cilësuar këto protesta si zhvillime shpresëdhënëse.

Ai theksoi se rinia studentore dhe e gjimnazeve është e vendosur të luftojë për të ardhmen e saj në Shqipëri. Berisha shtoi se ata po luftojnë për çdo shqiptar.

“Java ishte java e eksplozionit të revoltës më të fuqishme studentore që ka njohur vendi. Ishte java në të cilën studentët e universitetit të Tiranës, gjimnazeve të Tiranës dhe më pas gjimnazeve të qarqeve Shkodër, Durrës, Vlorë, Elbasan, Korçë, Gjirokastër, universitetet e këtyre qarqeve dhe gjimnazet e këtyre qyteteve, dhe së fundmi dje greva e përgjithshme dhe gjimnazistëve në mbarë vendin, ishin zhvillimet më shpresëdhënëse, me jehonën më të madhe ndërkombëtare.

Ishin zhvillimet që dëshmuan, se rinia shkollore e Shqipërisë nuk pajtohet kurrë me narkoshtetin shqiptar, diktaturën autokratike të bazuar në drogën, krimin dhe vjedhjen e shqiptarëve.

Se rinia e universiteteve dhe gjimnazeve të vendit nuk pranon më tutje piramidën e mashtrimit mediatik dhe propagandist që iu është bërë atyre në vite e vite.

Duke paraqitur farsën zgjedhore si votë të lirë. Duke paraqitur produktet e drogës si suksese. Duke mashtruar me idealet evropiane të cilat në të vërtetë rrënoheshin çdo ditë e më shumë. Duke korruptuar shtetin në çdo qelizë, gjuhën dhe mendimin.

Rinia studentore dhe e gjimnazeve të vendit u ngrit mbi këtë gërmadhë, e vendosur të luftojë për të ardhmen e saj të vërtetë në Shqipëri.

Në këtë kuadër, këta të rinj po luftojnë në të vërtetë për çdo shqiptar, për fëmijët e çdo shqiptari të ndershëm, po luftojnë që ëndrrat e tyre t’i ndërtojnë në Shqipëri.

Besoj se çdo qytetar, çdo prind, çdo burrë dhe grua, kudo që punon duhet të ndjejë përgjegjësinë reale ndaj tyre sepse narkoshteti nuk zbriti nga qielli.

Narkoshteti dhe Padrino që vrau, që dogji si zjarrvënësi më i egër i shqiptarëve, dogji ëndrrat e qindra mijëra të rinjve dhe i detyroi ata të largohen nga Shqipëria, nuk zbriti nga qielli, por ishte këtu midis nesh.

Edhe si një akt reflektimi që u pranua de facto të ndërtohet para syve tanë shteti i drogës. U pranua de facto që zgjedhjet të shndërrohen në farsë të turpshme zgjedhore dhe përsëri të quhen zgjedhje.

Edhe për faktin se kanë shpërthyer me dhjetëra e dhjetëra skandale, të cilat faktojnë vjedhjen e miliarda e miliarda eurove nga pronat publike dhe buxheti i shtetit, u vazhdua me të njëjtën tolerancë.

Pra, në njëfarë mënyre këta djem dhe vajza të mençur dhe guximtarë po përballen sot me egërsinë më të madhe të sistemit të bazuar në drogë që u ndërtua para syve tanë.

Të sistemit që u bazua në vjedhjen e shqiptarëve, ndaj të cilit nuk u reagua siç reagon çdo komb i qytetëruar kur ndjehet i vjedhur. Pra, ka një detyrim madhor ndaj këtyre të rinjve nga shoqëria shqiptare që të derdhet në rrugë dhe t’i mbështesë”, tha ai.

Teksa në kryeqytet regjistrohet dita e 5-të e protestës, këtë të shtunë në Elbasan po zhvillohet protesta e radhës. Në Elbasan është dita e tretë e protestës.

Të mbledhur në rrugët kryesore të qytetit, protestuesit kanë nisur marshimin e tyre teksa kanë bërë thirrje për dorëheqjen e kryeministrit Edi Rama.

Në krahasim me tubimet e zhvilluara në ditët e mëparshme, sot në rrugët e Elbasanit vihet re një pjesëmarrje më e pakët në numër. Ata kanë djegur koshat e mbeturinave dhe kanë dëmtuar sinjalistikën rrugore.

Marshi po vijon i organizuar përgjatë akseve kryesore, ndërsa forcat e rendit po ndjekin ecurinë e tubimit për garantimin e sigurisë.

Ka nisur këtë të shtunë protesta e të rinjë në qytetin e Korçës, ku një grup qytetarësh janë mbledhur për të marshuar përgjatë rrugëve kryesore. Ndryshe nga tubimet e ditëve të mëparshme, këtë herë vihet re një pjesëmarrje më e ulët në numër.

Pavarësisht pjesëmarrjes më të reduktuar, protestuesit po vijojnë marshimin e tyre duke përcjellë mesazhet e tyre. Situata në terren është paqësore dhe pa asnjë incident të shënuar deri më tani, ndërsa forcat e rendit po monitorojnë tubimin për ruajtjen e rendit dhe sigurisë.

Protesta e studentëve dhe të rinjve ka hyrë këtë të shtunë në ditën e saj të pestë radhazi, me grupet e para të protestuesve që kanë nisur grumbullimin përpara Ministrisë së Arsimit.

Efektive të shumtë të Policisë së Shtetit dhe forcave të rendit kanë krijuar një kordon, duke monitoruar nga afër situatën me qëllim garantimin e rendit publik.

Protestuesit kanë bërë thirrje që policia të mos ushtrojë dhunë ndaj tyre siç ka ndodhur në ditët e mëparshme gjatë përplasjeve. Ata gjithashtu shprehen se policia po provokon popullin.

Princ Leka Zogu këtë të shtunë ka dalë me një reagim në rrjetet sociale lidhur me protestat e studentëve që po zhvillohen prej disa ditësh në Tiranë dhe disa qytetet të vendit. Princ Leka shkruan se oborri Mbretëror qëndron në krah të studentëve shqiptarë në ushtrimin e së drejtës së tyre për të protestuar.

Në reagim, gjithashtu ai i bën thirrje Policisë së Shtetit të tregojë përmbajtje dhe profesionalizëm dhe se çdo sjellje e papërshtatshme duhet të bëhet objekt i llogaridhënies.

Reagimi i plotë:

Oborri Mbretëror qëndron në krah të studentëve shqiptarë në ushtrimin e së drejtës së tyre për të protestuar. Kemi ndjekur me kujdes të gjitha aktet e dhunës dhe denoncimet për keqtrajtimin e të rinjve dhe të miturve, si në rrugë, në furgonët e policisë, ashtu edhe në komisariate, dhe ndihemi të shqetësuar për sigurinë e tyre.

Çdo veprim është dokumentuar përmes videove dhe fotografive, ndaj institucionet përkatëse duhet të veprojnë në përputhje me ligjin dhe të sigurojnë që kushdo që ka abuzuar me detyrën të mbajë përgjegjësi.

I nxisim studentët t’i bëjnë të njohura shqetësimet e tyre edhe përtej kufijve të Shqipërisë, duke informuar komunitetin ndërkombëtar dhe duke përcjellë me vërtetësi dhe përgjegjësi atë që shohin dhe përjetojnë në terren. Zëri i tyre duhet të dëgjohet dhe realiteti të pasqyrohet me ndershmëri.

Gjithashtu, i bëjmë thirrje Policisë së Shtetit të tregojë përmbajtje dhe profesionalizëm. Autoritetet kanë detyrimin të mbrojnë qytetarët, jo t’i intimidojnë apo të përshkallëzojnë tensionet përmes përdorimit të tepruar të forcës. Çdo sjellje e papërshtatshme duhet të bëhet objekt i llogaridhënies.

Protesta paqësore duhet të shoqërohet edhe me përgjegjësi. Dhuna dhe dëmtimi i pronës private janë të papranueshme dhe cenojnë legjitimitetin e çdo kauze të drejtë. Oborri Mbretëror bën thirrje për qetësi, dialog dhe respektim të të drejtave themelore. Zëri i të rinjve shqiptarë duhet të dëgjohet dhe e ardhmja e tyre të mbrohet.

Policia e Tiranës ka dalë me një njoftim zyrtar lidhur me protestuesit e shoqëruar të premte gjatë incidenteve. Policia bën me dije se janë vënë në pranga 10 persona teksa janë proceduar 22 të tjerë.

Policia bën me dihe se protestuesit kanë qëlluar me gurë dhe sende të forta në drejtim të efektivëve dhe godinës së Ministrisë së Arsimit. Në njoftim theksohet se sulmet me gurë kanë dëmtuar fizikisht 8 punonjës të policisë dhe kanë shkaktuar dëme materiale në godinë dhe në sinjalistikën rrugore.

Njoftimi i plotë:

Tiranë/ Në vijim të veprimeve hetimore dhe procedurale të kryera nga strukturat e Drejtorisë Vendore të Policisë Tiranë, në lidhje me tubimin e zhvilluar dje:

-u arrestuan në flagrancë shtetasit, K. B., 20 vjeç; L. L., 18 vjeçe; J. Ë., 37 vjeç; M. J., 28 vjeç; R. B., 30 vjeç; E. Xh., 23 vjeç; E. B., 19 vjeç; E. V., 21 vjeç; K. S., 20 vjeç dhe K. B., 18 vjeç;

-u proceduan penalisht 22 shtetas.

Këta shtetas janë kapur duke qëlluar me gurë dhe sende të tjera të forta në drejtim të punonjësve të Policisë dhe godinës së Ministrisë së Arsimit, duke dëmtuar fizikisht punonjësit e Policisë dhe duke shkaktuar dëme materiale në godinë dhe në sinjalistikën rrugore.

Gjatë tubimit të djeshëm janë dëmtuar 8 punonjës Policie. Materialet procedurale iu referuan Prokurorisë, për veprime të mëtejshme

55 persona do të dalin këtë të shtunë para Gjykatës pas arrestimit të tyre ditën e mërkurë lidhur me incidentet e regjistruara në protestat studentore. Gjyqet kanë nisur që prej orës 08:30 teksa pritet të njihen me masat e sigurisë.

Nga ana tjetër, 17 persona janë proceduar penalisht pas protestës së zhvilluar një ditë më parë në qytetin e Korçës, ndërsa asnjë prej tyre nuk është arrestuar. Protesta u shoqërua me tensione, edhe pse nuk pati dëmtime si më parë nëpër institucion.

Më herët, policia kishte shoqëruar 25 të rinj për veprime të kryera gjatë protestës. Procedimi penal ndaj 17 personave vjen në vijim të hetimeve për incidentet e regjistruara gjatë tubimit.

Detaje të reja janë bërë me dije lidhur me protestuesit dhe efektivët e plagosur gjatë protestave studentore në Tiranë por edhe në qytetet e tjera ku janë zhvilluar protesta. Mësohet se në Spitalin Universitar të Traumës 21 persona kanë marrë trajtim mjekësor.

Sipas njoftimit mes të lënduarve janë 8 policë, 10 protestues dhe 3 kalimtarë. Lidhur me të riun i cili u plagos nga policia para Ministrisë së Arsimit, bëhet me dije se 21-vjeçari është nën monitorim dhe se nuk rezulton me rrezik për paralizë ose për ndërhyrje kirurgjikale.

Në spitalin rajonal të Vlorës 3 persona kanë marrë ndihmë mjekësore. Mes tyre edhe një polic. Ndërkohë në qytetin e Lezhës është lënduar një e mitur e cila pas marrjes së ndihmës mjekësore ka dalë nga spitali.

Njoftimi i plotë:

Gjatë ditës së djeshme, në Spitalin Universitar të Traumës 21 persona kanë marrë trajtim mjekësor në strukturat shëndetësore, nga të cilët:

* 8 efektivë të Policisë;

* 10 protestues, mes tyre 3 të mitur;

* 3 kalimtarë.

Nga personat e lënduar, dy prej tyre janë ende duke marrë shërbim. Një kalimtar (gjendja stabël) dhe një protestues, 21 vjeç, i cili po trajtohet dhe monitorohet nga ekipi i neurokirurgjisë. Aktualisht, nuk ka indikacion për ndërhyrje kirurgjikale dhe nuk rezulton rrezik për paralizë.

Të gjithë personat e tjerë kanë marrë trajtimin e nevojshëm mjekësor dhe janë larguar nga spitali me këshillën e mjekut, jashtë rrezikut për jetën.

Spitali rajonal Vlorë

– 1 efektiv i policisë (ka marrë trajtimin dhe ka lënë spitalin)

– 2 të mitur (kanë marrë trajtimin dhe kanë lënë spitalin)

Spitali rajonal Lezhë

– Një e mitur (ka marrë trajtim dhe ka lënë spitalin)

Kryeministri Edi Rama këtë të shtunë ka dalë në terren sërish për të monitoruar situatën dhe dëmet e lëna pas nga protestat studentore në kryeqytet. Rama ka parë nga afër dëmet në biznese teksa u bërë me dije se do të ndihmohen lidhur me dëmet. Ai shtoi se bizneset duhet të bëjnë ankim te ‘Dëmi im’ në e-Albania.

Ndër të tjera ai shtoi se mbron të drejtat e studentëve dhe shqiptarëve për të protestuar teksa theksoi se personat me maska që thyejnë bizneset po kryejnë krime. Rama shtoi se ata që shkatërrojnë pronat dhe bizneset do të mbajnë përgjegjësi.

“Do të bëjmë verifikime. Kemi bërë gati një dritare që do të shfaqet sot te E-Albania. Quhet ‘Dëmi im’ dhe këtu mund regjistroheni, duke dhënë identitetin e personit dhe NIPT-in dhe emailin, telefonin, të dhënat dhe sipërfaqja dhe kompania e sigurimit nëse keni.

Më pas do të ngarkoni dokumentet që janë pamjet, bashkë me çdo dokumentacion mbështetës që keni, fatura. Do të shihet dhe raporti që keni me shtetin, pagesat dhe detyrimet. Pasi të bëjmë verifikimet dhe të mbledhin një regjistër të dëmeve, do ju vimë në ndihmë të gjithëve.

Prej ditës së sotme, biznesi i vogël që është dëmtuar nga dhuna e dorës qore, ka një dritare për t’u ndihmuar. 10 grupe verifikime nga Tatimet do të jenë në terren për të mbledhur të dhënat mbi biznesin e vogël në Tiranë. Do të jemi bashkë, me ato familje që kanë humbur pasurinë dhe do t’i kthejmë këto gërmalla në sukses.

I respektoj studentët, i çmoj si motori i të parës, si shtysën për të ecur përpara. Zëri i tyre, i të rinjve që sot ka nevojë të protestojë, do të dëgjohet me respekt. Por pikërisht se të rinjtë janë e ardhmja jonë, s’do të lejoj që të rrezikohet askush. As për përfitime të atyre duarve të pista që janë kthyer për të shkatërruar, as ato duar të huaja.

Përgjegjësia ime është më e qartë në këto orë të vështira se sa në çdo ditë të mirë; të mbrojë qytetarët tanë, të garantojë drejtësinë dhe ta çojë Shqipërinë përpara, së bashku me këtë shumicë qeverisëse që ka një mandat shumë të qartë: Shqipërinë 2030 në Bashkimin Europian. Mos harroni se kemi arritur gjëra të jashtëzakonshme në një dekadë të vetëm. Kemi nisur të mbyllim negociatat në rrugën drejt majës ku do ta çojmë Shqipërinë me flamurin e Ismail Qemalit e të Skënderbeut në shtëpinë e Europës së përbashkët.

Kemi trefishuar Prodhimin e Brendshëm të vendit nga më pak se 10 miliard në thuajse 30 miliard euro. Kemi tërhequr gjithnjë më shumë investime të huaja, e kemi zgjeruar industrinë tonë të turizmit në një volum që as imagjinohej deri disa vite më parë dhe i kemi dhënë Shqipërisë dinjitetin që se ka pasur kurrë në sytë e mbarë botës.

Pagat. Pagat nuk janë asnjëherë mjaft, por kanë vazhduar të rriten dhe të rriten përsëri e përsëri, ndërkohë që borxhi publik është ulur vijimësisht në nivele historike. Sot shërbimet janë në masën dërrmuese me një klik përmes celularit apo kompjuterit më të afërt.

Sot Shqipëria është një vend tjetër dhe me këto arritje, me këtë bazë unë do të vazhdoj bashkë me ju ta çojmë Shqipërinë përpara, të ndërtojmë atë Europë këtu që na është mohuar për kaq e kaq shumë dekada e shekuj. Do të mbrojmë të drejtën e çdo studenti shqiptar për t’u arsimuar. Do të mbrojmë të drejtën e çdo shqiptari për të punuar dhe jetuar me punë të ndershme”, tha Rama.

Agjencia e Mbikëqyrjes Policore, AMP ka dalë me një reagim zyrtar lidhur me tensionet e regjistruara në protestat studentore në vend. AMP në reagim thekson se po monitoron situatën për të evidentuar dhe verifikuar çdo rasti të shkeljeve ligjore nga efektivët e policisë.

Më tej theksohet se AMP ka mbledhur materiale filmike nga mediat dhe pamje të publikuara në rrjetet sociale të cilat do t’i nënshtrohen analizës dhe verifikimit përkatës për sqarimin e plotë të rrethanave të çdo rasti dhe përcaktimin e përgjegjësive.

Njoftimi i plotë:

Agjencia e Mbikëqyrjes Policore (AMP) ka monitoruar situatën e krijuar gjatë protestave të zhvilluara në Tiranë dhe në qytete të tjera të vendit, me fokus evidentimin dhe verifikimin e çdo rasti të dyshuar për shkelje ligjore nga punonjësit e Policisë së Shtetit gjatë ushtrimit të detyrës.

Në kuadër të këtij procesi, punonjës të AMP-së kanë qenë të pranishëm në terren gjatë zhvillimit të protestave, duke evidentuar raste konkrete.

Gjithashtu, AMP ka administruar materiale filmike të transmetuara nga mediat audiovizive, si dhe pamje të publikuara në rrjetet sociale. Të gjitha materialet e administruara do t’i nënshtrohen analizës dhe verifikimit përkatës, me qëllim sqarimin e plotë të rrethanave të çdo rasti dhe përcaktimin e përgjegjësive, në përputhje me legjislacionin në fuqi.

Për rastet e evidentuara, AMP po vijon veprimet në përputhje me kompetencat e saj ligjore, në bashkëpunim dhe koordinim me strukturat përkatëse të Policisë së Shtetit, për shkëmbimin e informacionit dhe sqarimin e rrethanave të ngjarjeve, pa cenuar pavarësinë e procesit të verifikimit dhe hetimit. Për rastet kur janë evidentuar të dhëna që  përmbajnë elemente të veprave penale, veprimet procedurale vijojnë nën drejtimin e Prokurorisë pranë Gjykatës së Juridiksionit të Përgjithshëm Tiranë.

AMP mbetet e angazhuar në përmbushjen me përgjegjësi të misionit të saj ligjor, përmes pranisë aktive në terren, monitorimit të vazhdueshëm dhe verifikimit të çdo rasti që lidhet me ushtrimin e detyrës nga punonjësit e Policisë së Shtetit. Agjencia do të vijojë të bashkëpunojë me institucionet përgjegjëse, duke garantuar paanshmërinë, llogaridhënien dhe zbatimin e ligjit, si dhe respektimin e të drejtave dhe lirive themelore të qytetarëve.