Barcelona mori një fitore bindëse 5-2 në transfertën ndaj Betisit, por dëmtimet në prapavijë kanë ngritur pikëpyetje për ndeshjet e ardhshme. Zherard Martin u zëvendësua gjatë takimit, me Erik Garsian që hyri në fushë në fillim të pjesës së dytë.
Megjithatë, edhe Garsia pati probleme dhe u largua me vështirësi drejt stolit në minutat e fundit të ndeshjes. Pas përfundimit të takimit, trajneri Hansi Flik zbuloi se shqetësime fizike ka edhe Zhul Kunde, pa dhënë detaje të mëtejshme për gjendjen e tij.
“ Nuk e dimë se çfarë do të ndodhë me Erikun. Kunde ka disa probleme të vogla, Zherard po ashtu. Duhet të shohim. Kemi dy ditë më tepër kohë dhe do të shohim çfarë do të ndodhë të martën. Duhet të presim për rezultatin”, u shpreh Flik.
Tashmë, Barcelona duhet të presë rezultatet e vlerësimeve mjekësore për të mësuar nëse do të mund t’i ketë në dispozicion të tre lojtarët për sfidat e ardhshme, veçanërisht për përballjen me Real Madridin në “El Clasico”.